Oxu.az portalından alınan məlumata görə, ain.az xəbər verir.
Bu gün dünya MMA (Mixed martial arts - qarışıq döyüş sənəti) həvəskarlarının diqqəti "kazinolar şəhəri"nə yönələcək. UFC-nin budəfəki döyüş gecəsi Las-Veqasdakı "APEX arena"da baş tutacaq.
Gecənin əsas duelində Amir Albazi ilə Tatsuro Taira qarşılaşmalı idi. Lakin Albazi zədə səbəbilə yarışdan çəkildiyi üçün onun yerinə Cənubi Koreyadan olan döyüşçü Hyun Sunq Park daxil edildi. O, ilkin plana görə, avqustun 10-da Stiv Ertseq ilə döyüşməli idi, ancaq Albazinin zədəsi UFC-nin proqramında dəyişikliklərə səbəb oldu.
Təbii ki, 3 avqustda digər maraqlı döyüşlər də baş tutacaq və azarkeşlər, ənənəyə uyğun olaraq, yüksək adrenalinli qarşılaşmalara tamaşa edəcəklər. Bir çox MMA ekspertinin fikrincə, Las-Veqasdakı gecədə kifayət qədər güclü döyüşçülər üz-üzə gəlsələr də, mütəxəssislərin diqqəti gənc ulduz Kevin Valyexosa yönələcək. Bu gecə o, Danni Silva ilə oktaqona çıxacaq. UFC-də yalnız bir görüş keçirib, onda da qalib tərəf olan Valyexos MMA karyerasında 15-1 hesablı şəxsi rekorduna malik olmaqla, özünü yüksələn ulduz kimi təsdiqləməyə davam edir.
Kevin "El Chino" Valyexos Argentinanın yüksələn MMA ulduzlarından biridir. "El Chino" ispan dilində qarışıq irqli və ya xarici görünüşlü bir insanı təsvir etmək üçün istifadə edilən ləqəbdir. Bu ləqəb həm də ona işarədir ki, Valyexosun hekayəsi yaddaşında yalnız döyüşlərlə deyil, eyni zamanda, həyatla mübarizəsi ilə də həkk olunub.
Kevin Valyexos 8 dekabr 2001-ci ildə Argentinanın Buenos-Ayres şəhərində dünyaya gəlib. Gənc yaşlarında küçə həyatı və sosial çətinliklərlə üzləşib. Bu, əksər MMA döyüşçülərinin həyat hekayəsidir: yoxsul güzəran, idman və parlaq məşhurluq. Döyüş sənəti onun üçün yalnız məşğuliyyət yox, həyatını dəyişdirəcək bir çıxış yoludur. Əvvəl cüdo və boksla məşğul olub, daha sonra isə MMA-ya keçid edib. Maddi çətinliklərə baxmayaraq, o, məşqləri heç vaxt buraxmayıb.
Kevin uzun müddət Cənubi Amerika regionunda müxtəlif turnirlərdə döyüşüb. Onun tərzi - təzyiq altında soyuqqanlı qalması, texniki bacarığı və dözümlülüyü - azarkeşlərin və skautların diqqətini cəlb edib. Argentinanın yerli arenalarında, demək olar ki, məğlubedilməz bir döyüşçü obrazı yaradıb. 15 qələbəsindən bir çoxunu nokaut və ya dominant üstünlüklə əldə edib.
Kevin Valyexosun UFC-yə gəlişi, sadəcə, vaxt məsələsi idi. O, "Dana White`s Contender Series" və ya regional promouşnlardakı çıxışları ilə UFC kəşfiyyatçılarının radarına düşüb. Sonda ona müqavilə təklif olunub və "El Chino" da bu fürsəti maksimum dəyərləndirib. İlk UFC döyüşündə öz texnikası, hərəkətləri və əzmkarlığı ilə qalib gəlib və bir çox azarkeşin rəğbətini qazanıb.
Kevin hələ uzun yolun başlanğıcındadır, amma onun potensialı böyükdür. Fiziki hazırlığı, savaş mentaliteti və döyüşlərə yanaşması onun gələcəkdə UFC sıralarında ciddi adlardan birinə çevrilə biləcəyini göstərir.
Valyexos bu gecə ona olan diqqət və marağı doğruldacaqmı? Bir neçə saatdan sonra biləcəyik.
Bünyad Qaraxanlı
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
