Müəllif: Gülnar Əhmədli, Banco.az
ABŞ prezidenti Donald Tramp 68 ölkə və Aİ-yə qarşı ticarət tariflərinin tətbiqi haqqında fərman imzalayıb.
Banco.az xəbər verir ki, tariflər avqustun 7-də qüvvəyə minəcək .
Ağ Ev Çin, Kanada və Meksika da daxil olmaqla, bəzi ölkələrin rüsumlarının "ayrı-ayrı əmrlərlə idarə olunduğunu" açıqlayıb. Kanadada rüsumlar 25%-dən 35%-ə qaldırılıb.
Tariflərin artırılmasını elan edən Ağ Evin bəyanatında ABŞ-Meksika-Kanada Müqaviləsi (USMCA) çərçivəsində güzəştli tarif rejiminə uyğun malların yeni tariflərdən azad olduğu vurğulanıb.
Fərmanda qeyd olunmayan ölkələrə 10% baza tarifi tutulacaq.
Ən yüksək rüsumlar Əlcəzairə (30%), Bosniya və Herseqovina (30%), İraq (35%), Laos (40%), Myanma (40%) və Suriyaya (41%) təsir edəcək.
O cümlədən, MDB ölkələri arasında Qazaxıstan və Moldovadan gələn mallara 25% rüsum tətbiq edilib.
Aİ ölkələrindən gələn mallara 15% rüsum tətbiq edilib. Bu qərarı Macarıstanın baş naziri Viktor Orban tənqid edib. O xatırladıb ki, Macarıstan ABŞ-yə ildə təxminən 11 milyard dollarlıq mal ixrac edir və ABŞ-yə ixrac edən macar şirkətlərinin işçiləri ixtisar etməməsi və istehsal müəssisələrini bağlamaması vacibdir.
Orban Macarıstanın tariflərlə bağlı milli fəaliyyət planı hazırlamaq niyyətini də açıqlayıb.
Serbiya və İsveçrə kimi Aİ-yə daxil olmayan ölkələr ən yüksək tariflərdən bəzilərinə tabedir - müvafiq olaraq 35% və 39%.
Hər iki ölkə Tramp administrasiyasının hərəkətlərindən məyus olduğunu bildirib.
Bizi sosial şəbəkələrdən izləyin!!
