ABŞ-ın yeni sanksiyaları səbəbilə Rusiya nefti daşıyan azı iki gəmi Hindistana gedərkən kursunu dəyişib. Ticarət mənbələrinin və LSEG məlumatlarının bildirdiyinə görə, “Tagor” və “Tassos” adlı tankerlər artıq müvafiq olaraq Çinin Dalian və Misirin Port Said limanlarına yönəlib. “Guanyin” adlı üçüncü gəmi isə hələ də Hindistanın qərbində yerləşən Sikka limanına doğru hərəkətdədir.
News24.az xəbər verir ki, sanksiyalara məruz qalan bu üç gəmi – Aframax tipli “Tagor” və “Guanyin”, eləcə də Suezmax tipli “Tassos” – bu ay Hindistana Rusiya nefti çatdırmalı idi. ABŞ Prezidenti Donald Tramp, Rusiyaya qarşı təzyiqləri artıraraq, digər ölkələri Moskva ilə neft ticarətini dayandırmağa çağırıb və əgər Rusiya Ukrayna ilə sülhə razılaşmazsa, 100% tariflərlə hədələyib.
Rusiya Hindistanın əsas neft tədarükçüsüdür və bu cür sərt sanksiyalar Hindistanın enerji təhlükəsizliyinə təsir göstərir. Sanksiyalar, eyni zamanda, Rusiya neft gəlirlərini azaltmaq və Ukrayna müharibəsini maliyyələşdirməsinin qarşısını almaq məqsədi daşıyır.
Xeyrənsə Piriyeva
