Dəriyə təkcə baxım məhsulları deyil, suyun temperaturu da təsir edir.
Redaktor.az xarici mediaya istinadla xəbər verir ki, Amerika Dermatologiya Akademiyasının (AAD) yeni tövsiyəsinə əsasən, üzü soyuq su ilə yumaq bir neçə mühüm sahədə faydalı təsir göstərir.
Yaponiyanın Osaka Universitetində aparılan araşdırmaya görə, səhərlər üzün soyuq su ilə yuyulması həm dəriyə, həm də beyin aktivliyinə müsbət təsir göstərir. Tədqiqatda iştirak edən 60 nəfər üzlərini səhər soyuq su ilə yuduqdan sonra diqqət testlərində daha yüksək nəticə göstərib. Tədqiqatçılar bildirir ki, soyuq su dəridə qan dövranını stimullaşdırır, məsamələrin yığılmasına kömək edir və dərinin müdafiə funksiyasını gücləndirir.
Dermatoloq Dr. Emily Becker qeyd edir ki, soyuq su ilə yumaq dəridə şişkinliyi azaldır, iltihab əlamətlərini zəiflədir və xüsusilə yağlı dərilərdə yağ istehsalını tarazlayır. Bu üsul həm də günə oyanmaq üçün bədənin təbii cavabını gücləndirir, çünki soyuq su sinir sistemini aktivləşdirir.
Araşdırmanın nəticəsinə görə, gündə 1-2 dəfə üzün soyuq (lakin buz kimi olmayan) su ilə yuyulması dərinin sağlam qalması üçün kifayətdir. Lakin ekspertlər xəbərdarlıq edir ki, həssas və rozaseya kimi dəri problemləri olan insanlar bu üsulu ehtiyatla tətbiq etməlidirlər.
Nuriyyə NATİQQIZI
