Nəqliyyat eksperti Samuran Səmədbəyli sürücülərin dairəyə daxil olarkən dönmə işığını yandırmağın vacib olub-olmadığı barədə suallarına aydınlıq gətirib.
S.Səmədbəyli Pravda.az-a açıqlamasında deyib ki, dairəyə daxil olmaq da manevr hesab olunur.
“Yol Hərəkəti Qaydalarının 46-cı maddəsində açıq şəkildə göstərilir ki, sürücü hər hansı bir istiqamət dəyişməsi, yəni dönmə, yolayrıcına daxilolma, çıxma və ya hərəkət zolağını dəyişmə zamanı dönmə siqnalı ilə digər hərəkət iştirakçılarını xəbərdar etməyə borcludur. Dairə də bir yolayrıcıdır və ora daxil olan sürücü əksər hallarda sağa dönərək hərəkətə qoşulur. Belə olduqda isə sağ dönmə siqnalı verilməsi mütləqdir. Əgər sürücü dairədə sola doğru, yəni daha böyük radiusla hərəkət edəcəksə, bu zaman sol dönmə siqnalı verilməlidir. Digər tərəfdən, dairədən çıxış həmişə sağa doğru manevr sayıldığı üçün çıxış zamanı sağ dönmə siqnalı vermək bütün hallarda məcburidir. Bəzi sürücülər hesab edirlər ki, dairəyə daxil olarkən siqnal verməyə ehtiyac yoxdur, ancaq bu yanlış və təhlükəli yanaşmadır. Bu cür məsuliyyətsiz davranışlar digər sürücülərin hərəkətini çətinləşdirə və qəzalara səbəb ola bilər”, - o bildirib.
Ekspert vurğulayıb ki, qanunvericilik baxımından Yol Hərəkəti Qaydalarının 47-ci maddəsi birbaşa dairəvi hərəkətli yolayrıclarında manevr qaydalarına əməl olunmasını tələb edir: “Manevr qaydalarına isə dönmə siqnalı vermək də daxildir. Nəticə olaraq, dairəyə daxil olarkən və çıxarkən dönmə siqnalı vermək sadəcə tövsiyə deyil. Bu, qanunla tənzimlənən məcburi bir tələbdir. Sürücülər bu qaydalara əməl etməklə həm özlərinin, həm də digər yol hərəkəti iştirakçılarının təhlükəsizliyini təmin etmiş olurlar”.
Aytəkin Qardaşova
