Gəncə Apellyasiya Məhkəməsində yol qəzası törətməkdə təqsirləndirilən Qulam Nəbiyevin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Nural Əliyevin sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib. Hökmdən zərərçəkmiş şəxsin hüquqi varisi - mülki iddiaçı tərəfindən verilmiş apelyasiya şikayəti qismən təmin olunub, Gəncə Ağır Cinayətlər Məhkəməsinin hökmü mülki iddiaya aid olan hissədə dəyişdirilib. Belə ki, təqsirləndirilən şəxsdən maddi zərərə görə 2537 manat, mənəvi zərərə görə isə 4000 manat pul tutularaq zərərçəkmiş şəxsin hüquqi varisinə ödənilməsi qərara alınıb.
İttihama görə, hadisə 11 iyun 2024-cü il tarixdə, saat 23 radələrində Qazax şəhəri, Səməd Vurğun küçəsində qeydə alınıb.
Belə ki, Qulam Nəbiyevin idarə etdiyi “Mercedes Benz” markalı avtomobil hərəkətdə olarkən “Ford Tranzit” yük markalı maşını ilə toqquşub. Nəticədə “Ford Tranzit” zərbənin təsirindən hərəkət zolağından çıxıb, yolu piyada keçmək istəyən 1957-ci il təvəllüdlü Şahlıx Mustafayevanı vurub. Yaralı müalicə aldığı xəstəxanada 12 iyun 2024-cü il tarixdə vəfat edib.
Hadisədən sonra Qulam Nəbiyev saxlanılaraq cinayət məsuliyyətinə cəlb edilib.
Gəncə Ağır Cinayətlər Məhkəməsinin hökmü ilə o, 6 il müddətə azadlıqdan məhrum edilib.
Kamal Məmmədov
