Elektrik sayğacının çox pul yazması vətəndaşın narazılığına səbəb olub.
Oxu.Az-a daxil olan şikayətdə bildirilir ki, minimum elektrik sərfiyyatına baxmayaraq, gündəlik balansdan on manatdan çox pul silinir.
"Son bir ayda elektrik sayğacı ilə bağlı ciddi problem yaşayırıq. Bir neçə gün əvvəl bütün binada işıqların kəsildiyi vaxtda bizdə sayğacın balansı gözlənilmədən azalmışdı. Bu, sayğacın açıq-aşkar nasaz olduğunu göstərir.
Biz hazırda kilovatt/saatı 10 qəpikdən ödəniş edirik, amma lap 15 qəpikdən hesablasaq belə, yenə də gündəlik on manatdan çox elektrik enerjisi işlətdiyimizi düşünmürəm. "Azərişıq"la dəfələrlə əlaqə saxlamağa çalışmışam, nə cavab verən var, nə də gələn. İşlə əlaqədar "Azərişığ"ın ofisinə getmək imkanım da yoxdur",- deyə vətəndaş qeyd edib.
Məsələ ilə bağlı "Azərişıq" ASC-dən Oxu.Az-ın sorğusuna cavab olaraq bildirilib ki, sayğacda hər hansı bir nasazlıq müşahidə olunmayıb.
"Şikayət yerində araşdırılıb. Qiymətin artıq olması tarif dəyişikliyi ilə əlaqədardır. Şikayətçinin tarixçəsinə də baxılıb, hər hansı bir problem yoxdur. Sadəcə tariflər dəyişdiyi üçün abonentə elə gəlir ki, sayğac əvvəlkindən çox pul yazır. Əməkdaşımız sözügedən ünvanda vətəndaşın sayğacında heç bir problem olmadığını özünə də izah edib", - deyə məlumatda bildirilir.
