BAKI, 31 iyul. TELEQRAF
Prezident Donald Trampın Ukraynada şiddətlənən müharibəni bitirmək istəyi Rusiya və ABŞ arasında bütün Avropaya, o cümlədən ukraynalıların özləri üçün zərərli olacaq müəyyən razılaşma ilə nəticələnə bilər.
Teleqraf xəbər verir ki, bu barədə “Politico” yazır.
Məqalə müəllifləri xatırladırlar ki, ABŞ Avropanın əsas maye qaz tədarükçüsünə çevrilib. Bununla belə, hazırda Avropa İttifaqının şərqində yerləşən ölkələrdə Trampın müharibəni ən qısa vaxtda dayandırmaq arzusu ilə Rusiyaya siyasi və ticarət güzəştləri, o cümlədən Rusiyanın Avropa enerji bazarına qayıtması təklif edəcəyi ilə bağlı qorxular artır. Bu cür qorxular əsasən Şərqi və Mərkəzi Avropadan olan ölkələr ifadə edirlər.
“Politico”nun məlumatlı həmsöhbətlərinin sözlərinə görə, hazırda Ağ Evdə iki fraksiya arasında mübarizə gedir: birincilər nəyin bahasına olur-olsun, Ukraynada sülh sazişi əldə etməyə çalışırlar, digər fraksiya isə ABŞ-nin Avropa bazarını Rusiyaya verəcəyi təqdirdə Amerikanın qaz hasilatı sahəsi üçün ağır nəticələrlə bağlı xəbərdarlıq edir.
Məsələn, Trampın vasitəçiliyi ilə əldə edilən sülh sazişi ABŞ-nin Rusiya təbii qazına tətbiq etdiyi sanksiyaların ləğvini əhatə edə bilər. Avropa rəsmisinin sözlərinə görə, bu, Tramp administrasiyasının rus qazını avropalıların boğazından aşağı itələmək demək olardı.
“Politico” qeyd edir ki, Avropanın şərq cinahı “Qazprom”un soyuq qucağına qayıtmamaqda qəti qərarlı olsa da, Qərbi Avropa qitədə müəyyən parçalanma təhlükəsi yaradan vəziyyətə başqa cür baxa bilər.
“Bəziləri qorxur ki, Trampın şou və şişirtməyə meylli olması onu Rusiya ilə Ukraynanı zəiflədəcək və ABŞ-nin ixracına xələl gətirəcək sülh sazişinə sövq edəcək”, - nəşrin müəllifləri yekunlaşdırırlar.
Xatırladaq ki, Donald Tramp bundan əvvəl Ukrayna ilə razılaşma əldə etmək üçün Vladimir Putinə 10 gün vaxt vermişdi.
