AFFA Birinci Liqadan Premyer Liqaya yüksəlmiş 3 klubdan ikisinə – “Karvan-Yevlax” və “İmişli”yə bir mövsümlük möhlət verib.
Arena.az xəbər verir ki, bu barədə qurumun mətbuat xidməti məlumat yayıb.
AFFA İcraiyyə Komitəsinin 14 mart 2025-ci il tarixli iclasında 2025/2026-cı illər mövsümündə Azərbaycan Premyer Liqasında komanda sayının artırılması ilə əlaqədar Premyer Liqaya yüksələcək klublara infrastruktur, inzibati və digər sahələrdəki çatışmazlıqları aradan qaldırmaq üçün 1 illik möhlət verilməsi ilə bağlı qərar qəbul edilmişdi.
Bu qərara əsasən son 3 mövsümdə Premyer Liqada çıxış etməmiş və son mövsümün nəticələrinə əsasən Birinci Liqadan Premyer Liqaya yüksəlmiş klublara (“Karvan-Yevlax” FK, “İmişli” FK) bir mövsümlük aşağıdakı möhlətlər tətbiq edilir:
- Klubların nəzdində çalışan məşqçilər üçün Lisenziyalaşdırma qaydalarında nəzərdə tutulmuş Məşqçilik ixtisası dərəcələri bir kateqoriya aşağı məqbul hesab edilir (UEFA C kateqoriyadan aşağı olmamaq şərti ilə);
- U-16, U-17, U-19 və əvəzedici komandaları liqalarda iştirak etməyə bilər.
Qeyd edək ki, Birinci Liqadan Azərbaycan Premyer Liqasına vəsiqə qazanmış üçüncü komanda “Qəbələ”dir. Lakin bu klubla bağlı eyni güzəştlərin nəzərdə tutulmaması diqqət çəkir.
