“Almaniyada yaşayan blogger Qabil Məmmədov haqqında qərar bu gün qiyabidirsə, şübhəsiz ki, sabah real olacaq. Çünki Azərbaycanın hüquq-mühafizə orqanları öz mövqelərində ardıcıl, prinsipialdırlar və buna nail olacaqlar”.
Bu sözləri Pravda.az-a açıqlamasında Milli Məclisin deputatı Hikmət Babaoğlu deyib.
“Hazırda elə tarixi mərhələdə yaşayırıq ki, hər bir ölkənin inzibati siyasi sərhədləri olduğu kimi onun informasiya sərhədləri də var. Bu sərhədlərin qorunması da milli təhlükəsizliyin əsas komponentlərindən biridir. İnformasiya cəbhəsində milli maraqlara qarşı başqalarının əllərində alət olub savaşanlar elə döyüş səhnəsində Vətənə qarşı düşmən tərəfinə keçib savaşan “əsgərlərlə” eynidirlər. Artıq bilirik, neçə illərdir, müxtəlif ölkələrin təhlükəsizlik qurumlarının çətiri altında gizlənərək Azərbaycana qarşı müharibə aparanlar var. Onlar Azərbaycan qanunları və Azərbaycan qarşısında məsuliyyət daşıyırlar. Düşünürəm, bir kəsin əməlində cinayət tərkibi varsa, o cəzalandırılmalıdır, onun haqqında məhkəmə hökmü qiyabi olsa belə. Bilirik ki, Azərbaycanın hüquq-mühafizə orqanları prinsipial, öz mövqelərində qətiyyətlidirlər. Maraqlarımıza zidd hərəkət edən və hərəkətlərində cinayət tərkibi olan hər bir şəxsi harada olmasından asılı olmayaraq məsuliyyətə cəlb edirlər. Gec-tez bunun praktik tərəfini də icra etmiş olurlar”, - deputat bildirib.
Aytəkin Qardaşova
