Təbriz VƏFALI
***
Ta bineyi-qədimdən Azərbaycan özünəməxsus mətbəxi, özünün zəngin, tamlı və dadlı təamları ilə məşhur olub. Ölkəmizin qədim və ən çox sevilən xörəklərindən biri də soyuq havalarda böyük iştahla, sirkəylə, sarımsaqlı qatıqla və ya abqora, yəni, kal üzümdən alınmış üzüm meyvəsinin şirəsi olan qorasuyu ilə yeyilən xaş, digər adı ilə kəllə-paçadır.
“Beyinyeyən”lərdən danışmışkən, yadıma “beyin köçü”, “beyin axını” düşdü. Azərbaycan müstəqillik qazanandan üzübəri ölkəmizdə “intellekt axını” hər il özünü büruzə verir. Xüsusilə də respublikamızda bəzi yüksək ixtisaslı mütəxəssislərin beyin məhsullarının normal qiymətləndirilməməsi, onların əməklərinin “beyinyeyən”lər, “kannibal-xaşpərəst”lər tərəfindən istismar olunması, peşəkar kadrlarımıza cüzi pulun verilməsi, onların normal yaşam tərzi qurmalarına şəraitin yaradılmaması və digər səbəblər üzündən xarici ölkələrə miqrasiya baş verir. “Düşünən beyin”lərin sayının azalması isə dövlətimizdə elmi-texniki inkişafa və iqtisadi tərəqqiyə öz mənfi təsirini göstərir.
Ona görə də istər redaksiyalarda, istər elm və təhsil müəssisələrində, istərsə də digər sahələrdə işçilərin əməklərini istismar edən “kannibal-xaşpərəst”lərə, “beyinyeyən”lərə qarşı mübarizə sərtləşdirilməli, peşəkarların, yüksək ixtisaslı kadrların maaşları artırılmalı, işçilərin gördükləri işlərə, mütəxəssislərin beyin məhsullarına düzgün qiymət verilməlidir.
MİA.AZ
