Riyaziyyat sadəcə bir dərs deyil – seviləndə gündəlik həyatda düşünmə və problemləri həll etmə bacarığını gücləndirən əsas alətdir.
Pravda.az bildirir ki, uşağınızın bu sahədə uğur qazanması üçün onu erkən yaşda riyaziyyatla tanış etmək və bu sahəyə marağını artırmaq vacibdir. Bunun üçün valideynlərin rolu böyükdür. Mütəxəssislər uşaqlara riyaziyyatı sevdirmək üçün aşağıdakı 5 üsulu tövsiyə edir:
Riyaziyyatı gündəlik həyatla əlaqələndirin
Riyaziyyatı yalnız dərsliklərlə məhdudlaşdırmayın. Marketdə alış-veriş zamanı ödəniş hesablamalarını uşağınıza həvalə edin, məhsulların çəkisini birlikdə hesablamaqla praktiki vərdişlər qazandırın. Əşyaların sayını gündəlik həyatdakı nümunələrlə öyrədin.
Danışıq tərzinizə diqqət yetirin
Əgər riyaziyyatın çətin və qorxulu olduğunu dilə gətirsəniz, uşağınız da bu fənnə qarşı mənfi münasibət formalaşdıra bilər. Bunun əvəzinə onu həvəsləndirin və uğur qazanacağına inandırın.
Oyunları riyaziyyata daxil edin
Uşaqlar oyunla daha tez öyrənirlər. Saylarla bağlı masaüstü oyunlar, pazl və idmanla əlaqəli hesablamalar (məsələn, xallar, müddətlər) bu baxımdan faydalı vasitələrdir. Origami və digər yaradıcı məşğələlər də say və formaları öyrənmək üçün əyləncəli üsullardandır.
Oyuncaq kassa ilə pul hesablamasına təşviq edin
Uşağınıza sevəcəyi oyuncaq kassa alaraq hər gün pul toplamasını, həftəlik hesabatlar aparmasını istəyin. Bu, həm sadə hesablamaları öyrənməyə, həm də maliyyə savadlılığına kömək edər.
Riyaziyyata erkən yaşda başlayın
Say taxtası ilə rəqəm saymaq, ev oyunlarında ətrafdakı əşyaların sayını müəyyənləşdirmək və gündəlik əşyaları ölçmək uşağın təməl riyazi bacarıqlarını inkişaf etdirə bilər. Beləliklə, məktəb dövründə də riyaziyyat onun üçün asan və maraqlı olacaq.
Əminə Bayramova
