Bu gün səhər saatlarında Bakıda Nərimanov-Avtovağzal istiqamətində hərəkət edən 67 saylı avtobusun sürücüsü sükan arxasında siqaret çəkib.
Bu barədə Pravda.az-a daxil olan şikayətdə bildirilib ki, sürücü ona etiraz edən xanım sərnişinə kobud şəkildə cavab verib.
“Mənə olar, 60 yaşım var. Dur get arxada otur, yoxsa avtobusu sürməyəcəyəm” deyən sürücü avtobusu yol kənarında saxlayıb.
Sərinişinlər irad bildirdikdən sonra sürücü yola davam edib.
Şikayət edən vətəndaş bildirib ki, sürücü yol boyu telefonla danışdığı halda avtobusu idarə edib.
Pravda.az məsələ ilə bağlı Azərbaycan Yolüstü Nəqliyyat Agentliyinə sorğu ünvanlayıb.
Qurumdan saytımıza verilən açıqlamada bildirilib ki, müntəzəm marşrut xətti üzrə sərnişin avtobusunu idarə edən sürücünün sükan arxasında telefondan istifadə etməsi qayda pozuntusu olmaqla yanaşı daşımaların təhlükəsizliyi baxımından da risk yaradır: “Qeyd olunan qayda pozuntularına qarşı inzibati tənbeh tədbirinin görülməsi AYNA-nın səlahiyyətinə aid olmasa da, sözügedən marşrut xətti üzrə daşıyıcıya məsələni araşdırıb və sürücü barədə müvafiq tədbirin görülməsi, eyni zamanda sərnişindaşıma normalarına riayət etməsi barədə tapşırıq verilib. Qeyd edək ki, sərnişinlər avtobuslarda rastlaşdıqları müxtəlif hallarda hüquq mühafizə orqanlarına, eləcə də AYNA-nın “141” Çağrı Mərkəzinə müraciət edə bilərlər. Bundan əlavə Agentliyin bütün sosial şəbəkə platformaları üzərindən də müraciət etmək mümkündür”.
Aytəkin Qardaşova
