Azərbaycanın sənaye zonalarında xarici investisiyaların artması müşahidə olunur. İqtisadiyyat Nazirliyi yanında İqtisadi Zonaların İnkişafı Agentliyinin idarəçiliyində olan sənaye zonalarında bu günədək 15-dən çox xarici kapitallı şirkət rezident kimi qeydiyyata alınıb. Bu şirkətlər İsveçrə, Birləşmiş Ərəb Əmirlikləri, Tailand, Çin, Pakistan, Türkiyə, Bolqarıstan, Litva, Özbəkistan, Rusiya, İran və digər ölkələrdən olan şirkətlərdir və onlar sənaye zonalarında müxtəlif istiqamətlər üzrə istehsal fəaliyyəti göstərirlər. Fəaliyyət sahələrinə tikinti kimyəvi vasitələrinin hazırlanması, keramik plitələrin istehsalı, mühərrik və sənaye yağlarının təkrar emalı, kalium sulfat gübrəsinin istehsalı, elektrik avtomatları və sayğacları, dəri məmulatları, mətbəx avadanlıqları, bioloji aktiv qida əlavələri və dərman vasitələri, eləcə də avtomobil hissələri və nəqliyyat vasitələri daxildir.
Cari ilin ilk yeddi ayı ərzində sənaye zonalarına daha dörd yeni xarici kapitallı şirkət qoşulub. Bu şirkətlər Çin, Özbəkistan və BƏƏ mənşəlidir. Onların təqdim etdiyi layihələrin ümumi dəyəri 200 milyon manatdan çoxdur. Həmin layihələr çərçivəsində tekstil klasterinin yaradılması, lift və transformator istehsalı, elektrik avtobuslarının istehsalı kimi sahələrin inkişafı planlaşdırılır. Bu layihələrin həyata keçirilməsi ilə 3 000-ə yaxın yeni iş yerinin yaradılması nəzərdə tutulur.
İqtisadi Zonaların İnkişafı Agentliyi sahibkarlar üçün sənaye zonalarında əlverişli şərait yaratmaqla, həm yerli, həm də xarici investorların eyni hüquq və imkanlardan faydalanmasını təmin edir. Xatırladaq ki, Agentlik Prezident İlham Əliyevin 22 yanvar 2021-ci il tarixli fərmanı ilə “Sumqayıt Kimya Sənaye Parkı” MMC-nin bazasında publik hüquqi şəxs kimi yaradılıb və həmin il dövlət qeydiyyatına alınıb. Hazırda agentliyin tabeliyində 8 sənaye parkı, 3 sənaye məhəlləsi, Yevlax Pilot Aqropark və Peşə Təhsil Mərkəzi fəaliyyət göstərir.
Xarici investisiyaların sənaye zonalarına cəlb olunması bir sıra müsbət təsirlərlə müşayiət olunur. Bu, ilk növbədə ölkəyə xarici valyuta axınının artmasına, yeni texnologiyaların tətbiqinə, istehsal mədəniyyətinin yüksəldilməsinə və yeni iş yerlərinin açılmasına səbəb olur. İqtisadiyyatın şaxələndirilməsi baxımından da sənaye zonalarına yönələn investisiyalar mühüm əhəmiyyət daşıyır.
