ABŞ Federal Ehtiyatlar Sisteminin faiz dərəcəsi ilə bağlı qərarının açıqlanması ərəfəsində dollar major valyutalar qarşısında bir qədər dəyər itirib. EURUSD valyuta cütlüyü 1.15190 səviyyəsindən 1.15720 səviyyəsinə qədər bahalaşıb. Eyni müddət ərzində USDJPY cütlüyü 148.800 həddindən 147.840 həddinə kimi geriləyib. Qızıl təzyiq altında qalmaqda davam edir, lakin qiymətli metal ötən gün 3307$-dan 3334$-a qədər bahalaşıb.
Dünən ABŞ prezidenti Donald Trampın Rusiya-Ukrayna münaqişəsi ilə bağlı bəyanatlarından sonra beynəlxalq birjalarda neftin qiyməti əhəmiyyətli dərəcədə artdı. “Brent” markalı neftin bir barel üçün dəyəri 72.90$-a qədər kəskin şəkildə yüksəldi.
Ötən gün Tramp Rusiyaya Ukrayna münaqişəsini tənzimləmək üçün 10 gün vaxt verdiyini bildirib. Prezident qeyd edib ki, bu müddət bitdikdən sonra ABŞ vəd etdiyi tarifləri və "digər tədbirləri" Rusiyaya qarşı tətbiq edəcək. O həmçinin qeyd edib ki, Rusiyadan bu yeni müddətlə bağlı heç bir cavab almayıb: "Heç bir cavab almadım. Bu, təəssüf doğurur".
ABŞ Maliyyə Nazirliyinin rəhbəri Skott Bessent isə bildirib ki, Stokholmda Çin nümayəndə heyəti ilə danışıqlar zamanı Pekini Rusiya nefti alacağı təqdirdə qarşılaşa biləcəyi nəticələr barədə xəbərdar edib.
Çərşənbə axşamı Amerikada “Conference Board” tədqiqat şirkətinin yayımladığı hesabata əsasən, ABŞ-da İstehlakçıların İnam İndeksi iyul ayında 95.2 bənd səviyyəsindən 97.2 bənd səviyyəsinədək yüksəlib və analitiklərin 95.9 bəndlik proqnozunu üstələyib.
Həmçinin, iyun ayında ABŞ-ın əmək bazarında açıq vakansiyaların sayı (JOLTS) 7.712 milyondan 7.437 milyona qədər azalıb. Ekspertlər göstəricinin 7.510 milyon səviyyəsində olacağını proqnozlaşdırmışdılar. Əlavə olaraq, Amerikanın Ticarət Saldosunun kəsiri 96.59 milyard dollardan 85.99 milyard dollara qədər enib.
Bu gün FED tərəfindən açıqlanacaq faiz qərarı ilə yanaşı investorların diqqət mərkəzində Kanada Bankının (BoC) uçot faiz dərəcəsi ilə bağlı toplantısının nəticələri, ADP tərəfindən açıqlanacaq Qeyri-kənd Təsərrüfatı Sektorunda Yeni Yaranan İş Yerlərinin Sayı və Almaniyada, Avrozonada və ABŞ-da dərc olunacaq ÜDM göstəriciləri olacaq.
Məlumat İnvest-AZ İnvestisiya Şirkətinin analitikləri tərəfindən hazırlanıb.
