Hər il 30 iyul tarixi dünyada Beynəlxalq Dostluq Günü kimi qeyd olunur. Bu günün əsas məqsədi müxtəlif millətlər, mədəniyyətlər və fərqli cəmiyyətlər arasında sülhü, qarşılıqlı anlaşmanı və həmrəyliyi təşviq etməkdir. Dostluq, təkcə şəxsi münasibətlərdə deyil, həm də beynəlxalq miqyasda insanların bir-birinə olan münasibətində mühüm rol oynayır.
Sfera.az xəbər verir ki, Birləşmiş Millətlər Təşkilatı bu günün qeyd olunmasını 2011-ci ildə rəsmi şəkildə elan edib.
Qurum bu təşəbbüsü irəli sürərkən bildirirdi ki, dostluq insanların, ölkələrin və mədəniyyətlərin bir araya gəlməsi üçün əsas vasitədir. BMT həmçinin xüsusilə gəncləri bu dəyərləri paylaşmağa və yaymağa təşviq edir.
Dostluq eyni zamanda ayrı-seçkilik, irqçilik, ksenofobiya və nifrət ritorikasına qarşı ən güclü silahlardan biridir. Sülhsevər münasibətlərin inkişafı, bir-birini anlamağa çalışan insanlar arasında dostluq münasibətlərinin qurulması daha ədalətli və harmonik cəmiyyətlərin formalaşmasına səbəb olur.
Dünya miqyasında isə dostluq, xalqlar və dövlətlər arasında daha sabit, dayanıqlı və dinc münasibətlərin formalaşmasına kömək edir. Beynəlxalq Dostluq Günü bu baxımdan bir çağırışdır — münaqişələrə yox, dialoqa və anlaşmaya yer vermək.
30 iyulda müxtəlif ölkələrdə tədbirlər, seminarlar, məktəb layihələri, sosial media kampaniyaları və ictimai çıxışlar təşkil olunur. İnsanlar bu gün dostlarına xüsusi mesajlar göndərir, bir-birinə minnətdarlıqlarını bildirir və bəzən dostluq simvolu olan bağışlar edirlər.
Azərbaycan da bu mənəvi dəyərin yüksək qiymətləndirildiyi ölkələrdəndir. Xalqımızın tarixində dostluq, qonşuluq və qonaqpərvərlik kimi anlayışlar mühüm yer tutur. “Dost dar gündə tanınar” atalar sözümüz də bu dəyərlərin nə qədər köklü olduğunu göstərir.
Bəsti Rəfizadə
Sfera.az
