Hər hansı islahat yalnız bəzi dövlətlərin deyil, bütün ölkə və xalqların səsinin eşidildiyi sistemin yaradılması ilə nəticələnməlidir.
Day.Az xəbər verir ki, bu fikri Milli Məclisin sədri Sahibə Qafarova iyulun 29-da İsveçrənin Cenevrə şəhərində keçirilən Parlament Sədrlərinin VI Dünya Konfransındakı çıxışında BMT-də islahatlar mövzusuna toxunaraq bildirib.
Spiker Sahibə Qafarova deyib ki, beynəlxalq hüquq normaları və prinsipləri qorunmalı, ikili standartlar rədd edilməli, qəbul edilmiş qərarlar həyata keçirilməlidir. Yalnız bu şərtlər altında hamı üçün sülh, ədalət və rifahın təmin edilməsi məqsədlərinə nail olmaq mümkündür.
O qeyd edib ki, BMT-nin mərkəzində dayanan güclü və inklüziv çoxtərəfli sistem bütün problemlərə real və uzunmüddətli həlləri təmin etmək imkanına malikdir. Bununla belə, BMT sistemində effektiv islahatların aparılması ilə bağlı müzakirələr hələ də davam edir.
