“Vaşinqton və Pekin arasında rüsumların tətbiqinin təxirə salınması ilə bağlı razılaşmanın uzadılıb-uzadılmaması barədə qərarı ABŞ prezidenti Donald Tramp verəcək”.
“Report” xəbər verir ki, bunu Stokholmda Çin tərəfi ilə ticarət danışıqlarından sonra ABŞ-nin maliyyə naziri Skot Bessent deyib.
Bessent bildirib ki, o, Amerika liderinə müsbət mənada baş tutan məsləhətləşmələr barədə hesabat təqdim etmək niyyətindədir:
“Burada hər şeyin necə getdiyi barədə Trampa məlumat verəcəyik. Görüşlərimiz əlbəttə ki, konstruktiv keçdi. Lakin Tramp rüsumların tətbiqində fasilənin uzadılmasına qərar verəcək”.
ABŞ-Çin ikitərəfli ticarət danışıqları 28-29 iyul tarixlərində Stokholmda baş tutub. “Sveriges” radiosunun verdiyi məlumata görə, məsləhətləşmələrdən sonra tərəflər tarif barışığını daha üç ay uzadıblar.
