525.az saytından alınan məlumatlara görə, ain.az xəbər verir.
Vüqar Bayramov, millət vəkili:
Ev almaq istəyənlər üçün şad xəbər: nizamnamə kapitalı artırıldı. İpoteka və Kredit Zəmanət Fondunun nizamnamə kapitalı 85.00 milyon manat artırılaraq 1 milyard 153 milyon manata çatdırılıb. Bununla bağlı Azərbaycan Prezidenti fərman imzalayıb. Nizamnamə kapitalının artırılması dövlət büdcəsindən güzəştli ipoteka kreditlərinin maliyyələşdirilməsi üçün 85 milyon manatın ayrılması ilə mümkün olub.
Azərbaycan Prezidenti İlham Əliyev hər il İpoteka və Kredit Zəmanət Fondunun nizamnamə kapitalının artırılması ilə əlaqədar müvafiq fərman imzalayır. Dövlət büdcəsindən ayrılan bu vəsaitlər sosial ipoteka kreditlərinin maliyyələşdirilməsi üçün istifadə olunur. Praktik olaraq, hər maliyyə ilində güzəştli ipoteka kreditlərinin verilməsi üçün ayrılmalar olur və həmin ilin payızında vəsait nizamnamə kapitalına əlavə olunur.
Bütövlükdə, fondun nizamnamə kapitalı artdıqca daha çox ipoteka kreditlərinin təklifi mümkün olur. Bu eyni zamanda güzəştli şərtlər ilə kreditlərinin portfelini də genişləndirir. Deməli, bu həmçinin daha çox vətəndaşlarımız üçün güzəştli ipoteka krediti götürmək imkanı deməkdir.
İndiyədək fond tərəfindən 54 min 918 ipoteka krediti verilib. Verilmiş ipoteka kreditlərinin məbləği isə 3 milyard 560 milyon manatdan çoxdur.
İlkin Rüstəmzadə, ictimai fəal:
- Dünənki Justin Timberlake konserti videolardan gördüyüm qədər çox babat keçib. Eyni sənətçinin Tbilisidəki konsertindən qat-qat izdihamlı və maraqlı. Ümumiyyətlə, Bakı yavaş-yavaş Tbilisinin regiondakı turizm liderliyini ələ keçirir. Və bir azdan fərq əməlli açılacaq. Çünki Bakı qat-qat əzəmətlidir Tbilisidən.
Bu cür konsertlər isə şəhərin beynəlxalq turist vizitkartı üçün çox vacibdir. Lakin vacib bir detal var. Sadəcə dünya ulduzlarını, məşhurları gətirməklə olmur bu iş.
Bir şəhərin beynəlxalq sənət, turizm vizitkartını yaratmaq üçün məşhurlardan əlavə, mütləq öz kultunu yaratmış sənətçilərin, qrupların konsertləri olmalıdır.
Məsələn, "Metallica", "Rammstein", "Depeche Mode", U2 və s.
Sizi əmin edirəm, bu qrupların hər hansı birinin, xüsusilə ilk ikisinin Bakıda konserti olsa, bütün böyür-baş ölkələr yağacaqlar Bakıya.
Yarım milyon bilet satarsan "Metallica"ya, "Rammstein"ə.
Üstəlik, elə çətin bir şey də deyil. Məsələn, "Rammstein" qrupunun solisti Till Lindemanın çox yaxın dostları azərbaycanlılardı.
Adamı aparıb toyda Yanıq Kərəmi mahnısına oynadan gücü, pulu olan qaqalar, Bakıda konsertini də təşkil edə bilərlər də.
Lazımdır, hətta vacibdir. Eləyin bunu.
Nigar Köçərli, "Ali və Nino"nun təsisçisi və direktoru:
- Dünənki konserti bəyəndiniz? Məncə, Justin yola verirdi.
Fərid Pərdəşünas, texnobloger:
- "Dream Fest"dən sonrakı görüntülər yayılıb. Bütün sahə plastik tullantılar və zibilin içindədir. Bunu da səhifələr paylaşıb, ora gedən insanları söydürür. Guya söyənlər ora getsə, o plastikləri sən demə, udub, təkrar istehsal edəcəklərmiş.
Böyük ehtimalla, axşamkı "Timberlake" konsertində də eyni mənzərə yaşanacaq, normal olaraq. Bu, bütün dünyada olan konsertlərə aiddir. Bəli, ciddi problemdir, amma nəyisə istehlak edən insanlar onu o sıxlıqda çıxarıb harasa ata bilmirlər. Xoşbəxtlikdən bütün plastik və zibil nəzarət altında olur və sonradan təşkilatçı onu təmizləyir.
Yəni bu, tamamilə normal prosesdir. Sadəcə bizim cəmiyyət əylənən insanlara düşməndir. Xoşbəxt görünmək, öz pulunu xərcləmək, sevgilini öpmək olmaz. Mən nə "Dream Fest"ə getmişəm, nə də axşamkı konsertə gedəcəyəm, ümumiyyətlə marağımda deyil, amma insanların əyləncəsini təhqir etmək çox təhlükəli düşüncədir.
Çalışın belə düşüncədə olmayın. Oldunuzsa da, o düşncəni boğun, basdırın. Qoyun ölsün.
İlhamiyyə Rza, jurnalist:
- Qəbələyə gedirik. Şamaxıdan keçəndə şaşırdım. Atamın sağlığında Qazaxa gedəndə bizim dayanacaq nöqtəmiz məhz Şamaxı idi. Doğmalaşmışdıq. Uzun illərdir olmamışam burda. Necə gözəlləşib! Həmişə gözəl idi, əslində. Amma indi çox səhmanlı, zövqlü, müasir dəyir gözümə. Heyif ki, ötüb keçirik, şəhərin girişindəki dəmir heykəlləri doyunca seyr edə bilmədim. Mütləq qayıdacam. Bölgələrin mədəni siması vacib mövzulardandır...
Səddam Laçın, şair:
- Şuşada qonaqlar ətrafa zir-zibil atıb, şəhəri pis günə qoyublar. Ayıb olsun. Başqa sözlər də demək olar, lakin bura yeri deyil.
Amma bir ayıb da hər fürsətdə xalqını düşməni ilə müqayisə edənlərə olsun.
- "Şuşanı ermənilərdən təmizlədik, özümüzkülərdən təmizləyə bilmədik"
- "Heç ermənilər Laçını belə kirlətməmişdi"
Bu və bu qəbildən olan müqayisələr və paralellər məqsədli edilməsə də, düşmənin çörəyinə yağ sürməkdir. Heç yağ-zad, cəhənnəm. Özümüzü hansı ermənilərlə müqayisə edirik?
Bizi didərgin salan?
Milyonlarla adamı evsiz-eşiksiz qoyan?
Minlərlə vətəndaşımızı vəhşicəsinə qətlə yetirən?
Xocalıda qız-gəlinin kürəyinə samovar bağlayan?
Hamilə qadınların qarnındakı uşağa belə rəhm etməyən?
Evlərimizi, abidələrimizi dağıdan?
Hələ də gözü torpaqlarımızda olan?
Firuz Mustafa, yazıçı:
- Mixail Qusmanın oğlu Vadim BMT-də Azərbaycanı təmsil edib və ədalət naminə deyək ki, daim bizim milli mənafəyimizin müdafiəsində, habelə qonşularımızın separatizminə qarşı mücadilədə fəal mövqeyi ilə tanınıb.
Bədirxan Əhmədov, ədəbiyyatşünas alim:
- Çexiyanın Marianski Lazni şəhərində Maksim oteli gördüm, diqqətimi çəkdi. Məlum oldu ki, Maksim Qorki iki il burda mühacirətdə yaşayıb və bu evdə qalıb. İndi otel onun adınadır. Ayrıca bu istirahət məkanının su mənbəyi (kolonada) da onun adınadır. Onun adına olan qonşu binada isə rus yazıçısı İvan Qonçarov 15 il yaşayıb. Ona da lövhə qoyublar. İ.Gete də bir müddət burada yaşayıb, ancaq hələ barelyefinə rast gəlməmişəm.
Turan İbrahimov, jurnalist:
- Rus teleqram və yutub kanallarında tirajlanan "Rusiyadan, rus mədəniyyətindən uzaqlaşan Azərbaycan mədəni cəhətdən kasıblaşır" təbliğat tezisini bir konsertlə büküb Moskvanın qoltuğuna verən reallıq və görüntü.
Rusiya Federasiyasından 16 mindən çox, digər SNQ ölkələrindən isə yüzlərlə turist Bakıya axın etdi...
Postsovet məkanının cazibə mərkəzi artıq Moskva yox, Bakıdır. Mübaliğəsiz... rəqəmlərlə, görüntülərlə...
Asif Nərimanlı, jurnalist:
- Xameneinin müşaviri Əli Əkbər Vilayəti Zəngəzur dəhlizi ilə köhnə iddiaları yenidən gündəmə gətirib. İddia edir ki, bu dəhliz NATO-nun Cənubi Qafqaza, Xəzər regionu və Mərkəzi Asiyaya nüfuz etməsinə şərait yaradacaq. Və İranla Rusiyanı regionun cənubunda blokadaya salacaq.
Vilayətinin iddiaları - dəhliz layihəsini geosiyasi mübarizənin elementi kimi təqdim etməsi, xüsusilə Rusiyaya təhlükə yaratması haqda dedikləri Moskva ilə gündəliyini eyniləşdirmək və onun dəstəyini əldə etmək məqsədi daşıyır. Vurğunu məhz NATO təhlükəsi və Rusiya üçün strateji regionlar üzərinə yönəltməsi də buna hesablanıb. Onun digər iddiası da şübhəlidir. Vilayəti deyir ki, "İran daha öncə "qırmızı xəttini" elan edib və sərhəddə (Azərbaycanla sərhəd) hərbi təlimlər keçirməklə dəhlizin açılmasının qarşısını alıb". Hərçənd, Zəngəzur dəhlizinin indiyə qədər açılmamasına səbəb İranın sərhədə "leşkər" toplaması yox, regionda güc balansının toqquşması olub:
- Bakı, Ankara və Moskva dəhlizlə bağlı ortaq mövqedən çıxış edir, İrəvan isə Qərb tərəfdaşlarının, xüsusilə Bayden Administrasiyasının dəstəyi ilə müqavimət göstərirdi;
- Rusiya Ukrayna müharibəsinə görə prosesə müdaxilə etmir/edə bilmirdi;
- Bakı və Ankara alternativ variant kimi Qərbdən edilən təklifləri də dəyərləndirirdi.
Bu prosesdən kənarda qalan İran yalnız Ermənistan üçün regionda alternativ "qapı" rolunu oynayır, eyni zamanda, Fransa başda olmaqla Qərbdə dəhlizə qarşı çıxan oyunçularla "paslaşırdı". Tehran hələ o vaxt da indiki iddiaları - "NATO/Turan dəhlizi" məsələsini Moskvanın mövqeyinə təsir etmək məqsədilə gündəmə gətirirdi.
İndi situasiyanın dəyişdiyi müşahidə edilir: Bakı, Ankara və İrəvan xəttində müzakirə edilən regional kommunikasiyanın açılması prosesində Moskvanın birbaşa iştirakı arxa plana keçib.
İranın son dövrlər Zəngəzur dəhlizi ilə bağlı intensiv açıqlamalarının birinci səbəbi budur: Moskvanı öz cəbhəsinə çəkmək, xüsusilə Tramp Administrasiyasının təklifləri fonunda.
İkinci səbəb İsraillə 12 günlük müharibədən sonra regionda İranın gücünə olan inamın azalmasıdır, xüsusilə indiyə qədər Tehranı alternativ "qapı" olaraq görən İrəvan üçün. Buna görə İran proseslərə yeganə müdaxilə imkanı olan Ermənistan amilindən məhrum olmaq riski ilə üzləşib. Vilayətinin "qırmızı xətlərdən" bəhs etməsi və "dəhlizin qarşısını biz aldıq" deməsi Ermənistana xatırlatmadır.
Tehran mövqelərini Moskva ilə birləşmək xətti üzərindən saxlamaq niyyətindədir. Mövcud şərtlərdə - ABŞ-ın prosesə müdaxiləsi fonunda İranla mövqelərini eyniləşdirmək Rusiyanın "əlini gücləndirsə" də, strateji perspektivlərdə sərfəli görünmür. Lakin əsas risk cari dövrdə Tehran və Moskvanın regiona hansı təhlükələr yarada biləcəyidir. Daha öncə Bakıya qarşı Tehran-Moskva marşrutu üzərindən təhlükələr olub. Vilayətinin "passiv və müşahidəçi siyasət erası"nın bitdiyini elan etməsi də bu kontekstdə xəbərdarlıq hesab oluna bilər.
Hadisənin gedişatını izləmək üçün ain.az saytında ən son yeniliklərə baxın.
