Almaniya çempionu “Bayern” qapıçısı Sven Ulrayx ilə razılıq əldə edərək, oyunçu ilə müqavilənin müddətini uzadıb.
Arena.az bu barədə Münhen klubunun rəsmi saytına istinadən məlumat verir:
Klub 36 yaşlı qolkiperin müqaviləsini 1 il müddətinə, 2026-cı il iyunun 30-dək uzadıb.
Sven Ulrayx “Bayern”ə 2015-ci ildə “Ştutqart”dan gəlib. Daha sonra, 2020-ci ildə münhenlilər Ulrayxı “Hamburq”a transfer ediblər. 2021-ci ildə isə Ulrayx azad agent qismində “Bayern”ə qayıdıb.
Geridə qalmış mövsümdə Ulrayx “Bayern”in heyətində cəmi 2 oyuna çıxıb, 1 qol buraxıb, 1 oyunda qapısının toxunulmazlığını təmin edib. Ulrayxın Almaniya nəhənginin heyətində ümumi statistikası isə belədir: 103 oyun, 117 buraxılmış qol, 34 “quru” oyun.
Ulrayx “Bayern”lə 9 dəfə Bundesliqanın, 3 dəfə Almaniya Kubokunun, 6 dəfə Almaniya Super Kubokunun, UEFA Çempionlar Liqasının və UEFA Super Kubokunun qalibi olub.
Ulrayx Almaniya yığmasına dəvət alsa da, debüt imkanı almayıb.
