ain.az xəbər verir, Oxu.az saytına əsaslanaraq.
Qazaxıstan hökuməti Rusiya limanları ilə Avropa İttifaqı (Aİ) ölkələrinə kömürün tranziti ilə bağlı əməliyyatlara qoyulan qadağaların ləğv edilməsi barədə razılığa gəlib.
Oxu.Az-ın xəbərinə görə, bu barədə Qazaxıstanın Ticarət və İnteqrasiya Nazirliyindən məlumat verilib.
"2025-ci ilin fevralında Aİ-nin 16-cı sanksiyalar paketi çərçivəsində Rusiyanın bir sıra limanları ilə hər hansı əməliyyatlara qadağa qoyulub. Bu, Qazaxıstan kömürünün Avropa ölkələrinə ixracının davamlılığına təhlükə yaradıb. Məsələn, Ust-Luqa limanı tarixən Qazaxıstan kömürünün Avropaya tranziti üçün əsas məntəqə kimi istifadə edilib", - deyə məlumatda bildirilib.
Bu məsələnin həlli üçün Qazaxıstan hökumətinin nümayəndələri Avropa tərəfi ilə danışıqlar aparıblar. Sanksiyaya müvafiq dəyişikliklərin edilməsi üçün Avropa Komissiyasının ünvanına rəsmi müraciət göndərilib.
"18-ci sanksiyalar paketi çərçivəsində aparılan danışıqlardan sonra Avropa tərəfi Qazaxıstan kömürünün tranziti üçün Rusiyanın bəzi limanları ilə əməliyyatlara qoyulan qadağanın aradan qaldırılmasını nəzərdə tutan düzəlişlər edib", - deyə məlumatda qeyd edilib.
Eyni zamanda, kömür yalnız Qazaxıstandan çıxmış olmalıdır. Yükə mülkiyyət hüququ məhdudlaşdırıcı tədbirlərin tətbiq olunduğu ölkələrin qeyri-rezidentlərinə məxsus olmalıdır, limanlar yalnız tranzit, yükləmə və ya göndərmə ərazisi kimi istifadə edilə bilər.
Nazirliyin məlumatına görə, görülən tədbirlər Qazaxıstan kömürünün Aİ-yə tədarükünün bərpasına, eləcə də logistika marşrutlarının dayanıqlılığının gücləndirilməsinə ümid etməyə imkan verir.
2024-cü ildə Qazaxıstanın Aİ-yə kömür ixracının həcmi 5.2 milyon ton və ya ümumi kömür ixracının 51.8%-ni təşkil edib. 2025-ci ilin yanvar-may aylarında ixrac 1.6 milyon ton və ya ümumi kömür ixracının 38.5%-i qədər olub.
Daha ətraflı məlumat və yeniliklər üçün ain.az saytını izləyin.
