"Qərb beş il ərzində təhlükə gözləyir, amma Kremlin planları daha tez reallaşa bilər..."
NATO-nun Haaqada keçirilən son sammitində müttəfiqlər böyük bir hədəf müəyyən edib: 2035-ci ilə qədər hərbi xərclər ümumi daxili məhsulun (ÜDM) 5 faizinə çatmalıdır.
Moderator.az xəbər verir ki, bu barədə "The Telegraph" nəşri yazıb.
Nəşr yazır ki, bu qərarın arxasında duran əsas səbəb isə təkcə Ukraynada gedən müharibə deyil, həm də Rusiya tərəfindən NATO ölkələrinə qarşı potensial təhdidin qarşısını almaq istəyidir.
Kreml beş il ərzində hücuma keçə bilər
"The Telegraph" xəbər verir ki, NATO-nun baş katibi Mark Rütte açıq şəkildə bəyan edib: Rusiya yaxın beş ildə yeni təcavüzə hazır ola bilər. Hətta bəzi ekspertlərin fikrincə, Putin bu qərarı daha da tez verə bilər.
Putinin növbəti hədəfi kimdir?
Rusiya hərbi strategiyası üzrə ekspert Rebekka Koffler də Rüttenin dəyərləndirməsi ilə razıdır. Onun fikrincə, Rusiya NATO ölkələrinə hücum etməyə risk etməz, yalnız Qərb müharibəyə birbaşa müdaxilə edərsə bu ssenari mümkün ola bilər.
Lakin Moldova kimi zəif və postsovet məkanında yerləşən ölkələr təhlükə altında qala bilər. Koffler bildirir ki, gələcək illərdə NATO-nun necə davranacağı, Putinin yeni ambisiyalarının miqyasını və formasını müəyyən edəcək.
Təkcə büdcə kifayət etmir, strategiya əsasdır
Koffler hesab edir ki, hərbi xərcləri artırmaq yetərli deyil. NATO Moskvanın strategiyasını dərindən dərk etməli və onun növbəti addımlarını əvvəlcədən hesablamağı bacarmalıdır. Ekspert xatırladır ki, daha 2014-cü ildə Krımın ilhaqından öncə o, Kremlin "asimmetrik" və ya "hibrid" müharibə taktikasına keçəcəyini xəbərdar etmişdi.
O, həmçinin vurğulayır ki, Ukraynadakı müharibə nə qədər uzun çəksə də, Rusiya öz strategiyasından imtina etməyib. Kreml hələ də NATO-nun şəbəkə əsaslı müdafiə arxitekturasını, xüsusilə C4ISR sistemlərini və peyk rabitəsini pozmağa çalışır.
NATO üçün beş təcili vəzifə
Rebekka Koffler NATO-nun dərhal diqqət yetirməli olduğu beş kritik istiqaməti belə sıralayır:
1. Kosmosun qorunması
Rusiya peykləri sıradan çıxara biləcək güclü antipeyk silahlarına malikdir. Bu isə NATO-nun rabitə və kəşfiyyat sistemlərini iflic edə bilər.
2. Kritik infrastrukturların kiber-müdafiəsi
Rusiyanın kibersilahları dünyanın ən güclülərindəndir. Artıq bəzi Avropa və ABŞ obyektlərinə sızma ehtimalları var.
3. Dənizaltı kabel infrastrukturunun müdafiəsi
Baltik dənizində son zamanlar qeydə alınan şübhəli hadisələr Kremlin dənizaltı sabotaj imkanlarına işarə edir.
4. Rusiyanın casusluq fəaliyyətlərinə qarşı tədbirlər
Moskva hələ də Qərb ölkələrinin strukturlarına nüfuz edir, agentlər cəlb edir və daxildən sabitliyi pozmağa çalışır.
5. Hərbi potensialın sürətli artırılması
Rusiya sursat, tank və dron istehsalını sürətləndirib. Qərb də eyni sürətlə öz hərbi gücünü artırmalı və əsgərləri hazırlamalıdır. Üstəlik, Rusiya 2026-cı ildən daimi çağırış sisteminə keçməyi planlaşdırır.
Zaman azdır, amma hələ də gec deyil
Koffler sonda xəbərdarlıq edir: NATO hələ də vaxt baxımından üstünlükdədir, amma bu fürsəti boşa vermək fəlakətlə nəticələnə bilər. Ukrayna artıq çox ağır bədəllər ödəyir. Əgər bu gün ciddi dərs çıxarılmasa, sabah təhlükə digər ölkələrin qapısını döyə bilər.
