Cəza bitdikdən sonra o, 5 il müddətində məhkəmə nəzarətində qalacaq...
Poliqon xəbər verir ki, ABŞ-ın "American Airlines" aviaşirkətinin keçmiş bilet xidmətçisi Estes Karter Tompson III təyyarə tualetində mobil telefonunu gizlədərək azyaşlı qızları videoya çəkdiyinə görə 18 il 6 ay müddətinə azadlıqdan məhrum edilib.
Boston dairə məhkəməsinin hakimi Culiya Kobik onun davranışını “dəhşətli” adlandırıb və qeyd edib ki, bu əməllər nəticəsində azyaşlı qurbanlar “günahsızlıqlarını itiriblər”.
Tompson 2024-cü ilin yanvar ayında Virciniya ştatının Linçberq şəhərində həbs edilib. Həmin vaxt 14 yaşlı bir qız onun işlədiyi reysdə tualetdə quraşdırılmış gizli çəkiliş cihazını aşkar edib. Məhz bu hadisədən sonra istintaq başlanıb.
Ötən il Tompsona azyaşlıların cinsi istismarına cəhd və onlara qarşı zorakılığı əks etdirən materialların saxlanması ilə bağlı iki maddə üzrə ittiham irəli sürülüb. Məhkəmədə o, etdiyi hərəkətləri “eqoist, pozğun və tamamilə səhv” adlandıraraq üzr istəyib.
Polisin məlumatına görə, Şimali Karolina ştatında yaşayan Tompsonun telefonunda 7-dən 14 yaşa qədər olan daha dörd azyaşlı qızın 9 ay ərzində təyyarə tualetindən istifadə etdiyi anlar qeydə alınıb.
Poliqon.info
