"Ukrayna üzərində Çin mənşəli pilotsuz uçuş aparatı aşkar edilib..."
Ukrayna kəşfiyyatının son açıqlamaları və beynəlxalq medianın araşdırmaları Pekinlə Moskva arasında dərinləşən hərbi əməkdaşlığın artıq gizlədilə bilməyəcək səviyyəyə çatdığını göstərir.
Moderator.az xəbər verir ki, bu barədə "The Telegraph" nəşri yazıb.
Nəşr qeyd edir ki, Çin istehsalı olan komponentlərlə tam yığılan pilotsuz uçuş aparatlarının (PUA) Ukrayna səmasında peyda olması bu ittifaqın real təzahürüdür.
Çin detallarından yığılmış "Rusiya dronu"
"The Telegraph" yazır ki, Ukrayna ərazisində ilk dəfə tamamilə Çin istehsalı olan və Rusiya tərəfindən istifadə edilən bir dron ələ keçirilib. "CBTS.611000" adlı bu aparat əsasən kəşfiyyat və hava hücumundan müdafiə sistemlərini çaşdırmaq üçün nəzərdə tutulub. Amma eyni zamanda 15 kiloqramlıq döyüş başlığı da daşıya bilir.
Ukrayna kəşfiyyatçıları tərəfindən analiz edilən bu dronun demək olar ki, yarısı "CUAV Technology" şirkətinin məhsulları ilə təchiz olunub. Bu komponentlərə autopilotlu uçuş nəzarətçisi, naviqasiya modulları, antenalar, sürət sensorları və Pito borusu daxildir.
Bu şirkət hələ 2022-ci ildə Rusiya və Ukraynaya məhsul ixracını dayandıracağını bəyan etsə də, faktlar əksini göstərir. Habelə, aparatlarda "Foxeer"-in birinci şəxs kamerası, "Mile Haoxiang Technology"-nin mühərriki və Çin istehsalı olan Avstraliya mənşəli məlumat ötürmə modulu da aşkarlanıb. Bu sistem 40 km-ə qədər məsafədə məlumat ötürmək imkanına malikdir və kəşfiyyat baxımından əhəmiyyətlidir.
Soyuducu kimi maskalanmış dron mühərrikləri
Digər tərəfdən, "Reuters" agentliyi məlumat verir ki, Çin "Garpiya-A1" tipli zərbə dronları üçün mühərrikləri Rusiya silah istehsalçılarına "sənaye soyuducu qurğuları" adı altında göndərir. Bu, Qərb sanksiyalarından yan keçmək üçün istifadə edilən üsullardan biridir. Məlumata görə, bu təchizatlar Rusiyanın "IEMZ Kupol" şirkətinin "Garpiya" istehsalını kəskin artırmasına imkan verib.
Belə ki, şirkət bu il ərzində Rusiya Müdafiə Nazirliyinə 6 minə yaxın dron təhvil verməyi planlaşdırır - bu, ötən ilin göstəricisindən üç dəfə çoxdur. Ukrayna kəşfiyyatı qeyd edir ki, bu uzaqmənzilli dronlar ayda təxminən 500 dəfə həm hərbi, həm də mülki hədəflərə hücum üçün istifadə olunur. Çin isə bu ittihamları rədd edir və beynəlxalq hüquqa əsaslanmayan sanksiyaları qəbul etmədiyini bildirir.
Pekin cavab verir, Qərb cəza axtarır
Çin XİN-in "Reuters"ə verdiyi açıqlamada qeyd olunur ki, ölkə "Garpiya" dronları üçün hər hansı detal ixracından xəbərsizdir və ikili təyinatlı malların satışına nəzarət edilir. Lakin ABŞ və Avropa İttifaqı bu izahatlarla kifayətlənmir. ABŞ-ın NATO-dakı nümayəndəsi Metyu Uitaker açıq şəkildə Çini Ukraynaya qarşı aparılan müharibəyə "sponsorluq etməkdə" ittiham edib və Pekinə qarşı sərt tədbirlərin görülməsini tələb edib.
Bu fonda Avropa İttifaqı ilk dəfə olaraq Çin banklarına qarşı sanksiyalar tətbiq edib. Siyahıya Rusiyaya yaxın bölgələrdə yerləşən Suyfenxe və Xeyxedəki kənd kommersiya bankları daxil edilib.
"Neytrallıq" görüntüsü altında silah tədarükü
Çinin rəsmi olaraq neytral mövqe nümayiş etdirməsinə baxmayaraq, praktiki reallıq tamamilə fərqlidir. Qərb istehsalı olan texnologiyaların sanksiyalarla əvəzləndiyi bir dövrdə, Çin artıq Rusiyanın əsas hərbi texnologiya təchizatçısına çevrilməkdədir. Ukrayna səmasında uçan Çin mənşəli dronlar bu əlaqələrin nə dərəcədə dərinləşdiyini ortaya qoyur. Bu isə təkcə Ukrayna üçün deyil, bütövlükdə beynəlxalq hüquq və qlobal sabitlik üçün yeni bir təhlükədir.
