Birləşmiş Millətlər Təşkilatının məlumatlarına əsasən, bu gün dünyada elm və texnologiya sahəsində çalışanların yalnız 28 faizi, rəqəmsal texnologiyalar üzrə iş yerlərində isə 22 faizi qadınlardan ibarətdir. Bu statistik göstəricilər cinslər arasında texnologiya sahəsində mövcud olan tarazsızlığı bir daha ortaya qoyur və bu sahədə qadınların daha çox dəstəyə ehtiyacı olduğunu təsdiqləyir. Azərbaycanda da vəziyyət qlobal tendensiyalara uyğun olaraq oxşardır. Ailə, Qadın və Uşaq Problemləri üzrə Dövlət Komitəsinin sədri Bahar Muradova “İKT-də Qadınlar” layihəsi çərçivəsində keçirilən “Rəqəmsal Sahibkarlıq” müsabiqəsinin qaliblərinin mükafatlandırma mərasimində çıxışı zamanı bildirib ki, ölkədə informasiya-kommunikasiya texnologiyaları sahəsində çalışanların təxminən 30 faizini qadınlar təşkil edir. Lakin texnologiyayönümlü sahibkarlıqda qadınların payı cəmi 15 faizdir. Bu fakt qadınların innovasiya və rəqəmsal iqtisadiyyat sahələrinə çıxış imkanlarının genişləndirilməsi və daha sistemli dəstəklə təmin olunmasının vacibliyini önə çıxarır.
Bu ehtiyacları nəzərə alaraq Dövlət Komitəsi, Rəqəmsal İnkişaf və Nəqliyyat Nazirliyi, eləcə də İnnovasiya və Rəqəmsal İnkişaf Agentliyi ilə birgə “Rəqəmsal Sahibkarlıq” müsabiqəsi təşkil edilib. Müsabiqənin əsas məqsədi qadınların informasiya-kommunikasiya texnologiyaları sahəsində təşəbbüslərini stimullaşdırmaq, onların yaratdığı və cəmiyyətə təsir edə biləcək layihələri ön plana çıxarmaq və geniş ictimaiyyətə tanıtmaqdan ibarətdir. Bu təşəbbüs, UNESCO-nun "İnformasiya Hamı üçün" (IFAP) proqramı çərçivəsində həyata keçirilir. Qeyd olunan proqram hal-hazırda 70-dən çox ölkədə fəaliyyət göstərir və əsas məqsədi informasiya texnologiyalarına universal çıxışı təmin etmək, xüsusilə qadınlar və qızlar arasında rəqəmsal bərabərsizliyi aradan qaldırmaqdır.
Müsabiqə yalnız qadınların texnoloji bilik və bacarıqlarını inkişaf etdirmək üçün bir platforma olmaqla kifayətlənmir, eyni zamanda qadınların rəqəmsal sahibkarlıqla məşğul olmasına, ideyalarının real layihələrə çevrilməsinə və iqtisadi cəhətdən daha aktiv sosial mövqe qazanmasına şərait yaradır. Bu kimi təşəbbüslər, qadınların İKT sektorunda iştirakını təşviq etməklə yanaşı, cəmiyyətin inklüziv inkişafına və iqtisadiyyatda cins balansının qorunmasına da töhfə verir.
Qadınların texnologiya və rəqəmsal sahibkarlıq sahəsində iştirakını artırmaq üçün təhsil imkanlarının genişləndirilməsi, mentorluq proqramlarının tətbiqi, maliyyə və hüquqi dəstəyin gücləndirilməsi mühüm əhəmiyyət daşıyır. Bundan başqa, stereotiplərin aradan qaldırılması, qadın rol modellərinin cəmiyyətə təqdim olunması və texnoloji sahələrdə qadınların nailiyyətlərinin görünən edilməsi də bu prosesin ayrılmaz tərkib hissəsidir.
