BAKI,TurkicWorld
Türkiyə Respublikasının Prezidenti Rəcəb Tayyib Ərdoğan, Ukrayna Prezident Ofisinin rəhbəri Andriy Yermakı Ankara-da, Prezident Külliyəsində qəbul edib.
TurkicWorld xəbər verir ki, bu barədə Türkiyə Prezident Administrasiyasından məlumat verilib.
Qəbul, Prezident Sarayında baş tutub və hər iki ölkə arasındakı əməkdaşlıq, regional təhlükəsizlik məsələləri və Ukraynada davam edən müharibə ilə bağlı son vəziyyətin müzakirə edildiyi ehtimal olunur.
Görüşün detalları barədə rəsmi açıqlama verilməyib. Lakin ekspertlər Yermakın Ankaraya səfərinin Rusiya-Ukrayna müharibəsi fonunda Türkiyənin vasitəçilik rolu və humanitar təşəbbüsləri ilə əlaqəli ola biləcəyini qeyd edirlər.
Ukrayna tərəfi də görüşlə bağlı əlavə açıqlama yaymayıb. Andriy Yermak, Ukrayna Prezidenti Volodimir Zelenskinin ən yaxın siyasi məsləhətçilərindən biri sayılır və xüsusilə beynəlxalq danışıqlarda və sülh təşəbbüslərində mühüm rol oynayır.
Qeyd edək ki, Ukrayna və Rusiya arasında sülh danışıqlarının yeni raundu bu gün İstanbulda keçiriləcək.
Rusiya nümayəndə heyətinə Prezident Vladimir Putinin müşaviri və baş müzakirəçi Vladimir Medinski rəhbərlik edir. Ukrayna tərəfini isə Milli Təhlükəsizlik və Müdafiə Şurasının katibi Rüstem Umerov təmsil edir.
Danışıqların gündəliyində bir sıra vacib məsələlər yer alır. Əsas mövzular sırasında əsirlərin dəyişdirilməsi, müharibə zamanı oğurlanaraq Rusiya ərazisinə aparılmış ukraynalı uşaqların geri qaytarılması, eləcə də münaqişə zonasındakı humanitar vəziyyətin yaxşılaşdırılması məsələləri dayanır.
Xatırladaq ki, bu, son beş ayda İstanbulda keçirilən üçüncü görüşdür. Əvvəlki iki görüşdə müəyyən humanitar razılaşmalar əldə edilmiş, xüsusilə də əsir mübadiləsi ilə bağlı konkret addımlar atılmışdı. Sonuncu görüş 2 iyun 2025-ci il tarixində baş tutmuşdu.
Danışıqların nəticələri ilə bağlı hələlik rəsmi açıqlama verilməyib. Tərəflərin günün ikinci yarısında mətbuata məlumat verməsi gözlənilir.
