“Həqiqətən də, Rusiya nümayəndə heyəti İstanbula gedib və doğrudur, axşama orada danışıqlar planlaşdırılır. Bu, Rusiya-Ukrayna danışıqlarının üçüncü raundu olacaq”, – Rusiya prezidentinin mətbuat katibi bildirib.
Peskovun sözlərinə görə, ölkələrin nümayəndələri ilk növbədə Ukrayna böhranının nizamlanmasına dair memorandum layihələrini, həmçinin “qarşılıqlı mübadilənin davam etdirilməsi”ni müzakirə edəcəklər. Eyni zamanda, o, müzakirələr zamanı “başqa mövzuların da qaldırıla biləcəyini, bu barədə qərarın nümayəndə heyətlərinin rəhbərləri tərəfindən veriləcəyini” istisna etməyib.
Daha əvvəl TASS agentliyi mənbəyə istinadən xəbər vermişdi ki, Rusiya və Ukrayna arasında danışıqların üçüncü raundu iyulun 24-nə planlaşdırılıb, nümayəndə heyətlərinin İstanbula gəlişi isə iyulun 23-də mümkündür.
Bununla belə, Türkiyə prezidenti Rəcəb Tayyib Ərdoğanın administrasiyasının mətbuat xidməti danışıqların iyulun 23-də, Moskva vaxtı ilə saat 19:00-da baş tutacağını bildirib. Görüşün Çırağan sarayında baş tutacağı və bir gündən çox sürməyəcəyi gözlənilir.
