Ajans.az lenta ru-ya istinadən xəbər verir ki, minimum əməkhaqqı (MƏƏ) 2026-cı il yanvarın 1-dən etibarən 22,4 min rubl səviyyəsindən Rusiya hökumətinin təklif etdiyi təqribən 27 min rubla deyil, birbaşa olaraq 50 min rubla qaldırılmalıdır. Beləliklə, minimum əməkhaqqı iki dəfədən çox artırılacaq. Bu barədə “Ədalətli Rusiya – Həqiqət uğrunda” partiyasının sədri Sergey Mironov 360.ru portalına məlumat verib. Məqalədə qeyd olunur ki, Dövlət Dumasının deputatı artıq bununla bağlı müvafiq qanun layihəsini parlamentin müzakirəsinə təqdim edib. Mironov təklif etdiyi məbləği vətəndaşların son illərdəki qiymət artımları fonunda əsas ehtiyaclarını qarşılaya biləcək minimum yaşayış səviyyəsi adlandırıb. Onun sözlərinə görə, hazırda ölkədə işləyən vətəndaşların təxminən yarısı bu qədər maaş belə almır. Bundan əvvəl məlum olmuşdu ki, Ali İqtisad Məktəbinin (VŞE) “Ev təsərrüfatlarının iqtisadi davranış barometri” adlı araşdırmasına əsasən, rusiyalıların normal həyat sürməsi üçün 2025-ci ildə orta hesabla 81 min rubl aylıq gəlirə ehtiyacı var – bu da 2023-cü ilin payızına nisbətən 14 faiz çoxdur. Respondentlərin üçdə biri isə 30-50 min rubl arası aylıq gəliri normal hesab etdiklərini bildirib.
