Neftin qiymətinin artması cümə günü səhər İraqda neft yataqlarına pilotsuz uçuş aparatlarının hücumu ilə bağlı xəbərlərin səbəb olduğu əvvəlki günün artımından sonra davam edib.
Banco.az xəbər verir ki, Londonun ICE Futures birjasında Brent markalı neftin sentyabr fyuçerslərinin qiyməti 0,26 dollar (0,37%) artaraq 69,78 dollar/barelə çatıb. Cümə axşamı bu kontraktlar 1 dollar (1,46%) artaraq 69,52 dollar/barel olub.
Nyu-York əmtəə birjasının (NYMEX) elektron ticarətində avqust ayı üçün WTI neftinin fyuçersləri bu vaxta qədər 0,23 dollar (0,34%) artaraq 67,77 dollar/barelə çatıb. Əvvəlki sessiyanın yekunlarına görə, bu müqavilələrin dəyəri 1,16 dollar (1,75%) artaraq bir barel üçün 67,54 dollar təşkil edib.
KİV-in məlumatına görə, İraq Kürdüstanında neft yataqlarına pilotsuz təyyarələrin zərbələri neft hasilatını gündə təxminən 150 min barel azaldıb. Regionda ümumilikdə sutkada təxminən 280 min barel hasil edilir.
Neft infrastrukturu obyektlərinə edilən hücumlara görə məsuliyyəti heç kim üzərinə götürməyib, lakin Reuters İraq rəsmilərinə istinadən yazır ki, şübhə İranın dəstəklədiyi üsyançıların üzərinə düşür.
