"İsrailin planlarını Allah pozdu, bu rejimin kökü mütləq kəsiləcək..."
İranın ali dini və siyasi lideri Ayətullah Əli Xamenei Tehranda keçirilən son çıxışında İsrailə və Qərb ölkələrinə qarşı ən sərt bəyanatlarından birini səsləndirib.
Moderator.az xəbər verir ki, bu barədə "cursorinfo.co" nəşri məlumat yayıb.
O, İsraili "qansızan, bədxassəli xərçəng şişi" adlandıraraq, regionun bütün fəlakətlərinin mənbəyi kimi göstərib və bu rejimin "mütləq kökünün kəsiləcəyini" bildirib.
"İsrailin planlarını Allah pozdu"
Xamenei İranın İsrail ilə son 12 günlük müharibəsində qələbə qazandığını iddia edərək deyib ki, biz bu savaşda öz müqavimət gücümüzü göstərdik. Düşmənin planı vardı, lakin Allah onu alt-üst etdi. İsrailin fitnəsi boşa çıxdı. O, İsrailin Fələstin və Livandakı "müqavimət qollarını" məhv etməyə çalışdığını, lakin bu səylərin nəticəsiz qaldığını vurğulayıb.
ABŞ hərbi bazalarına zərbələr və xəbərdarlıqlar
Ayətullah eyni zamanda Qətərdə yerləşən və ABŞ qüvvələrinin istifadə etdiyi Əl-Udeyd hərbi bazasına qarşı həyata keçirilən raket hücumuna da toxunub. O, bu hücumu "xəbərdarlıq siqnalı" adlandıraraq əlavə edib ki, əgər gələcəkdə bir daha bizə qarşı hücum olarsa, cavabımız İsrailə vurduğumuz zərbədən daha dağıdıcı olacaq.
"ABŞ və Böyük Britaniya sionistlərin şərikləridir"
Ali liderin çıxışında ABŞ və Böyük Britaniya da hədəfdə olub. O, bu ölkələri İsrailin "cinayətlərinə ortaq olmaqda" ittiham edib və Qəzzada baş verən hadisələrdə onların da məsuliyyət daşıdığını bildirib. Amerika bu rejimin zəncirli iti kimi ona xidmət edir. Onların hərbi yardımları və siyasi dəstəyi bu cinayətkar siyasətin əsas dayaqlarıdır.
İran daxilində siyasi böhran: prezidentə çevriliş ittihamı
Bu sərt ritorika İran daxilindəki ciddi siyasi qarşıdurma fonunda baş verir. İran parlamentindəki 30-dan çox millət vəkili prezident Məsud Pezeşkianı İslam İnqilabını sona çatdırmaq cəhdində ittiham edərək onun dərhal istefaya göndərilməsini tələb edib. Parlamentin bəzi üzvləri, o cümlədən sabiq diplomat Əbülfəzl Zöhrəvand prezidentin siyasətini "Ali Liderə qarşı çevriliş planı" adlandırıb.
Prezidentin MAQATE ilə əməkdaşlığın dayandırılması barədə imzaladığı qanun və ABŞ-la danışıqlara maraq göstərməsi Xameneiyə yaxın dairələrdə qəzəblə qarşılanıb. Hətta onun "İslam İnqilabının məhvini sürətləndirdiyi" iddia olunur.
Region üçün təhlükəli siqnal
Ayətullah Xameneinin bu çıxışı yalnız daxili auditoriya üçün deyil, eyni zamanda bölgədəki gərginliyin yenidən alovlana biləcəyi haqda beynəlxalq ictimaiyyətə bir mesajdır. İsrailə qarşı sərt ritorika, ABŞ-a açıq hədə və nüvə danışıqlarının dalana dirənməsi həm İran daxilində, həm də regionda növbəti eskalasiyaların siqnalıdır.
Tehranın hərbi ritorikası, daxili siyasi qarşıdurma ilə birləşərək Yaxın Şərqdə növbəti partlayışa zəmin hazırlaya bilər. Xameneinin bəyanatları həm ideoloji, həm də strateji səviyyədə İranın Qərblə açıq toqquşmaya hazır olduğunu göstərir.
