FETÖ-nün strukturları tamamilə zərərsizləşdirilənə kimi Türkiyənin mübarizəsi davam edəcək.
“Report”un Ankaraya ezam olunmuş əməkdaşı xəbər verir ki, bunu Türkiyə Prezident Administrasiyasının Kommunikasiya İdarəsinin rəhbəri Burhanettin Duran 15 İyul- Demokratiya və Milli Birlik Günü münasibətilə keçirilən media proqramı çərçivəsində “15 İyul: Yaddaş, Ədalət və Gələcək” mövzulu paneldə çıxışı zamanı deyib.
O qeyd edib ki, 15 iyul Türkiyə tarixinə qızıl hərflərlə yazılan istiqlal zəfəridir:
“15 iyul dirənişi köklü transformasiyanın miladı olub. Bir millət düşmənə qarşı dayandı və bu, cəmiyyətlərdə çox sıx müşahidə edilən bir hal deyildi. Millətimiz yalın əlləri ilə FETÖ-nü darmadağın etdi. İnsanımız zərrə tərəddüd etmədən körpüyə tərəf yeridi. Müstəqillik sevdamız görülməyə dəyərdi. 253 şəhidimizə Allahdan rəhmət, 2500 nəfərdən çox qazimizə şəfa diləriyəm”.
B.Duran vurğulayıb ki, çevrilişci FETÖ-nün struturları tamamilə zərərsizləşdirilənə kimi mübarizə davam edəcək:
“Terrorsuz Türkiyə millətimizin gələcəyidir. Terrorsuz Türkiyə təxminən 50 il ölkəmizi istismar etməyə çalışan şəbəkənin sonu deməkdir”.
