Rusiyanın nüvə qüvvələri beş gizli nüvə obyektində genişmiqyaslı işlər görür.
Reyting.az “Business Insider”ə istinadla bildirir ki, bunu “Planet” laboratoriyasının 2025-ci ilin may-iyun aylarına aid son peyk görüntüləri üzə çıxarıb.
Bu infrastruktur dəyişiklikləri - çoxqatlı perimetrlər, yeni anqarlar, tunellər Rusiyanın nüvə silahlarının saxlanması, onlara xidmət göstərilməsi və ya daşınması üzrə imkanlarını artırdığını göstərir.
Nəşr imkanları artırılan obyektlərin siyahısını da təqdim edib:
1. Osipoviç (Belarus) - üç qat mühafizəsi olan yeni hasar, anqar, döyüş başlıqlarının daşınması üçün dəmir yolu platforması var.
2. Gadjievo (Murmansk) - sualtı raket anbarının yaxınlığında altı yeni struktur. BMT-nin Silahsızlanma Tədqiqatları İnstitutunun baş elmi işçisi Pavel Podviq qeyd edib ki, raket anbarı açıq şəkildə əhəmiyyətli dərəcədə genişləndirilir.
3. Kalininqrad - modernləşdirilmiş çoxqatlı perimetr, kamuflyajlı girişlər, yeni binalar, ehtimal ki, təhlükəsizlik strukturları.
4. Kamçatka - Sakit Okean Donanmasının bazası, çox güman ki, nüvə doldurulması ilə Poseidon supertorpedalarını saxlamaq üçün hazırlanır.
5. Novaya Zemlya - nüvə sınaqları tarixi olan arxipelaq. İdarə olunan subkritik təcrübələr üçün uyğun olan yeni tunellər və dayaq strukturları tikilib.
Qeyd edək ki, Rusiya nüvə obyektlərindən təzyiq vasitəsi kimi istifadə edir və bu təkmilləşdirmələr Ukraynaya qarşı müharibə və qlobal gərginlik fonunda baş verir.
Paralel olaraq, ABŞ və Çin də nüvə qüvvələrini təkmilləşdirir, nüvə rəqabətinin yeni mərhələsinə başlayırlar.
Mütəxəssislər istisna etmirlər ki, Rusiya obyektləri indi nüvə sınaqlarını gücləndirməyə hazırdır, baxmayaraq ki, bunu təsdiqləmək çətindir.
Pavel Podviq qeyd edib ki, Rusiyanın siyasəti var: “Obyekti sınaqları davam etdirməyə hazır vəziyyətdə saxlamaq istəyirlər”.
Onu da qeyd edək ki, 2022-ci ilin oktyabrında rus generalı Sergey Surovikin Ukrayna Silahlı Qüvvələrinin Dneprdən keçməsini dayandırmaq üçün onlara taktiki nüvə zərbəsi endirmək imkanını nəzərdən keçirib. Bu, Amerika tərəfinin müdaxilə etdiyi söhbətdən məlum olub.
Bu vaxta qədər ABŞ kəşfiyyatı belə bir nəticənin olma ehtimalını 5-10 faiz hesab edirdisə, tezliklə risk 50 faizə yüksəlib.
E. KAMAL
