Ukrayna Prezidenti Vladimir Zelenski ölkəsinin müdafiə cəbhəsindəki vəziyyətlə bağlı açıqlama verib.
KONKRET.az xəbər verir ki, o bildirib ki, Silahlı Qüvvələrin Baş komandanı Aleksandr Sırski və Baş Qərargah rəisi Andrey Qnatovla əsas istiqamətlərdəki vəziyyəti müzakirə edib.
Prezident vurğulayıb ki, Rusiya ordusunun irəliləməyə yönəlmiş bütün cəhdləri Ukrayna bölmələrinin davamlı müdafiəsi nəticəsində uğursuzluğa düçar olur:
“Düşmənin hücum cəhdləri davam edir, lakin hər biri bizim müdafiə dayanıqlığımız və aktiv fəaliyyətimiz sayəsində boğulur.”
Zelenski eyni zamanda Rusiyanın dərinliklərinə yeni uzaqmənzilli zərbələrin planlaşdırıldığını da bəyan edib:
“Vahid məqsədimiz müharibəni Rusiya ərazisinə keçirməkdir. Bölmələrimiz bunun üçün əllərindən gələni edəcək.”
Ukrayna lideri həmçinin silah istehsalı sahəsində irəliləyişlərə də toxunub: hazırda ölkənin ehtiyac duyduğu silahların təxminən 40%-i yerli istehsaldır. Onun sözlərinə görə, bu göstərici artırılmalı və Ukraynanın müdafiə müstəqilliyi daha da möhkəmləndirilməlidir.
Natiq Səlim,
KONKRET.az
