Cızılmış, əzilmiş və ləkələnmiş, Ceyn Birkin üçün nəzərdə tutulmuş qara dəridən tikilən “Birkin” çantası “Sotheby's”-də təxminən 10 milyon dollara satılıb.
Bu, indiyə qədər hərracda satılan ən bahalı çantadır. Qalib Yaponiyadan olan şəxsi kolleksiyaçı oldu.
“Cebheinfo.az” xəbər verir ki, ikonik Birkinin prototipinə çevrilən çanta 1985-ci ildə ona verilib və 1994-cü ilə qədər onu demək olar ki, hər gün əlində olub. Bu, “Hermes” üçün ən tanınan və bahalı moda ikonalarından birini yaratmaq üçün ilham verib. Çanta illər ərzində bir neçə dəfə əl dəyişdirsə də, Nyu Yorkdakı Müasir İncəsənət Muzeyində, Londondakı Viktoriya və Albert Muzeyində nümayiş etdirilib. O, sonuncu dəfə 25 il əvvəl hərraca çıxarılıb.
“Sotheby's”-in çanta və aksessuarların rəhbəri Morqan Halimi bu satışı moda tarixində "mərhələ" adlandırıb:
"Bu, əfsanənin gücünün və mənşənin kolleksiyaya olan həvəsi necə alovlandırdığının heyrətamiz nümayişidir. Bu, həm də Ceyn Birkinin özünün davamlı ruhunun və cazibəsinin sübutudur".
Çanta onu bütün sonrakı versiyalardan fərqləndirən səciyyəvi xüsusiyyətlərini özündə saxlayır: qeyri-adi ölçü, unikal avadanlıq, metal üzüklər və çıxarıla bilən qayış. Ön qapaqda “J.B.” baş hərfləri, qayışda isə Birkinin gündəlik istifadə etdiyi gümüşü dırnaq qayçısı var.
Bu gün “Birkin” pərəstişkarları bəzən çantaları investisiya kimi alırlar. 2016-cı ildə onların dəyərinin qızıldan və S&P 500-dən daha sürətli artdığı bildirlib.
İlk “Birkin” praktiki əşya kimi hazırlanmışdı. Qəribədir ki, bu prototip indi hətta almazla örtülmüş “Diamond Himalaya Birkin” (450 000 dollara satılır) və timsah dərisindən hazırlanan “Kellin”i (513 000 dollar) geridə qoyaraq moda tarixinin ən bahalı çantası olub.
2023-cü ildə vəfat edən Ceyn Birkin bir dəfə CNN-ə belə deyib: "Mən öləndə insanların xatırlayacağı yeganə çanta bu olacaq". İndi bu xatırə 10 milyon dollar dəyərləndirilib.
