Ölümlə danışarsan...!

"Ədəbi düşüncələr" rubrikasında şair Əli Hacı Ağaevlinin şeirlərini zaman-zaman oxuculara təqdim edəcəyik. Şairin sosial şəbəkələrdə böyük maraqla qarşılanan şeirləri müxtəlif illərdə yazılmış ədəbi nümunələrdir. Asan həzm olunan, dərin məna ehtiva edən bu şeirlər Əli Hacının mə­nəvi – ruhani dünyasının poetik ifadəsidir.

DUA

İlahi! Bir sevinc ver,
Kədərimə yavanlıq!
Gün-güzəran verginən,
Qədərimə yavanlıq!

Göylərin yağış-qarı,
Torpağına yavanlıq!
Kötüyün su içməsi,
Budağına yavanlıq!

Eçqini ver götürüm,
Yollarıma yavanlıq!
Yar yükünü bol elə,
Qollarıma yavanlıq!

Açarsız qoy qapımı,
Əllərimə yavanlıq!
Səd qoy,yersiz sözlərə
Dillərimə yavanlıq!

Fəsillərin geyimin,
Ver əynimə yavanlıq!
Yerin boş görünməsin,
Gir eynimə yavanlıq!

İlahi! Bir sevinc ver,
Kədərimə yavanlıq!
Gün-güzəran verginən,
Qədərimə yavanlıq!

* * *

Sağlığımda gəlmədin,
Olumla danışasan!
Ölsəm, başın sağ olsun,
Ölümlə danışarsan!

Söyüd ağacına bax,
Arxamca dua kimi!
Keçmişi gözünə tax,
Gündəlik sual kimi!

Əlindən tut evinin,
Həyatının suyun ver!
Mən,taledən küsmüşəm
Zər tutan oyundu-yer!

Gözlərində yaş qurut,
Yansın şəklim istidən!
Dilindəki adımın,
Xətt çəkərsən üstündən!

Bahar sənin, qış mənim
İndi payız fəslidir!
Qışa qədər yaşamaq,
Özü bir təsəllidir!

Sağlığımda gəlmədin,
Olumla danışasan!
Ölsəm, başın sağ olsun,
Ölümlə danışarsan...!



Xəbər 6 dəfə oxunub.