"Ukraynada sükut yoxdur, bizə ilk növbədə hava hücumundan müdafiə lazımdır..."
İyulun 11-də səhər saatlarında Rusiya ordusu eyni vaxtda Xarkov və Odessaya pilotsuz uçuş aparatları ilə hücum edib.
Moderator.az xəbər verir ki, bu barədə "delfi.lt" nəşri məlumat yayıb.
Məlumatda deyilir ki, hər iki şəhərdə mülki infrastruktura ciddi ziyan dəyib, xəsarət alanlar arasında qadınlar, körpələr və hətta heyvanlar da var.
Xarkovda doğum evinə zərbə nəticəsində yeni doğulmuş körpələr yaralanıb
Rusiya ordusunun dronlarla həyata keçirdiyi hücum nəticəsində Xarkovun Saltovka rayonunda bir neçə bina dağılıb, güclü yanğınlar baş verib. Xüsusilə, doğum evi, stomatoloji poliklinika və bir yaşayış binası zərər görüb. İlkin məlumata görə, azı doqquz nəfər yaralanıb, onlardan altısı qadınlar və onların yenicə doğulan körpələridir. Körpələrdən ikisi cəmi bir gün əvvəl, biri isə iyulun 8-də dünyaya gəlib.
Səhiyyə Nazirliyi məlumat verib ki, doğum evində 40-dan çox pəncərə dağılıb, stomatoloji poliklinika isə o qədər dağılıb ki, bərpası mümkün deyil. Çuquyev şəhər xəstəxanasında isə 200-dən çox pəncərə və 100-dən artıq qapı sındırılıb, orada həm işçilər, həm də xəstələr yaralanıb.
Prokurorluq bu zərbələr nəticəsində ana və uşaqlarda güclü psixoloji stres diaqnozu qoyulduğunu bildirib. Onlar hücum anında doğum evində olublar. Xarkov meri İqor Terexov onların təxliyə ediləcəyini açıqlayıb.
Odessada sahil boyu xaos: İnsanlar, at tövləsi və heyvanlar zərər çəkib
Elə həmin gün səhər saatlarında Rusiya pilotsuz təyyarələri Odessanı da hədəfə alıb. Hücum zamanı şəhərin müxtəlif bölgələrində - dəniz limanı, Çeremuşki rayonu və şəhər mərkəzində partlayışlar baş verib. İnsident zamanı səkkiz nəfər yaralanıb, əhaliyə təcili tibbi yardım göstərilir.
Ən təsirli görüntülərdən biri atların saxlandığı tövlənin dağıntılarıdır. Yerli sakinlərin paylaşdığı videolarda yaralı atlar, ağlayan qadınlar və heyvanlara yardım çağırışları görünür. Bir atın öldüyü bildirilir.
Yerli mənbələrdən verilən xəbərlərə görə, hədəfə alınan obyektlər arasında hərbi komissarlıq binası və avtoservis mərkəzi də olub. Hücum nəticəsində bir neçə maşın və mülki obyektlər də dağılıb.
Zelenski: "Ukraynada sükut yoxdur"
Ukrayna prezidenti Vladimir Zelenski bu hücumlara münasibət bildirərək, hava hücumundan müdafiənin gücləndirilməsini tələb edib: "Ukraynada sükut yoxdur. Dronlarla, raketlərlə, aviazərbələrlə daimi hücumlar davam edir. Ukraynaya müdafiə, ilk növbədə hava hücumundan müdafiə lazımdır".
