Tanınmış jurnalist, Aztimes.az saytının təsisçisi və baş redaktoru Pərvin Şakir qızı Abışova birinci vitse-prezident Mehriban xanım Əliyevaya məktub ünvanlayıb.
Pərvin Abışova məktubun bir nüsxəsini həmçinin KONKRET.az redaksiyasına da göndərib.
Həmin məktubu olduğu kimi təqdim edirik:
Azərbaycan Respublikasının Birinci Vitse-Prezidenti
Zati-aliləri Mehriban xanım Əliyevaya
Müraciət edən:
Abışova Pərvin Şakir qızı
Aztimes.az saytının təsisçisi və baş redaktoru
Mövzu: Jurnalist fəaliyyəti ilə bağlı qanunsuz təzyiqlərlə üzləşmə barədə
“Hörmətli Mehriban xanım,
Mən, Abışova Pərvin Şakir qızı, Aztimes.az saytının təsisçisi və baş redaktoru olaraq, dərin hörmət və inam hissi ilə Sizə müraciət edirəm.
2024-cü il 22 aprel tarixində, Ağcabədi rayonu Qaravəlilər kəndindən redaksiyamıza daxil olan vətəndaş şikayətləri əsasında həmin kənddə çəkiliş aparmalı olduq. Şikayətin mahiyyəti ondan ibarət idi ki, kənd sakinləri onlara ayrılmış örüş sahələrinin Ağcabədi Rayon İcra Hakimiyyətinin başçısı Rafil Hüseynov tərəfindən iş adamı Kazım Gülmalıyevə qanunsuz olaraq satıldığını bildirirdilər.
Jurnalist məsuliyyəti və obyektivliyi prinsiplərinə əsaslanaraq hadisə yerində çəkiliş apardıq və qarşı tərəfin mövqeyini də işıqlandırdıq. Lakin bir neçə gün sonra İcra başçısının köməkçisi Hafiz Hüseynov mənimlə əlaqə saxlayaraq kənd sakinlərinin dediklərinin yalan olduğunu bildirdi. Mən isə cavabımda qeyd etdim ki, onların da fikirləri materialda dərc olunub və biz tərəfsiz, obyektiv yanaşma prinsipinə sadiq qalmışıq.
Buna baxmayaraq, Hafiz Hüseynov vəzifə səlahiyyətlərindən istifadə edərək israrla həmin materialın saytdan silinməsini tələb etdi. Mən isə peşə prinsipimə uyğun olaraq materialı silməkdən imtina etdim.
Nəticədə, Ağcabədi Rayon İcra Hakimiyyətinin başçısı Rafil Hüseynov məni məhkəməyə verdi. Göyçay Rayon Məhkəməsində hakim İbrahim Fəttahovun sədrliyi ilə keçirilən proseslərdə iştirak etməyən icra başçısı sifarişli şəkildə məhkəmədə qalib gəldi. Yuxarı instansiyalara müraciət etmək imkanım süni şəkildə məhdudlaşdırıldı. Məhkəmə qərarı ilə mənim 1000 manat təzminat ödəməyim və üzr istəməyim tələb olundu.
Hörmətli Mehriban xanım, mən məhkəməyə bildirmişəm ki, tələb olunan təzminatı borc-xərc ilə ödəməyə hazıram. Lakin Göyçay Rayon İcra və Probasiya Şöbəsinin rəhbəri İlqar Abdurrahmanov bu məsələnin hüquqi baxımdan həlli üçün şərait yaratmır, əksinə, məni dəfələrlə məcburi şəkildə polisə gəlməyə çağırır.
Mən – üç uşaq anası, ləyaqətli bir Azərbaycan vətəndaşı və ölkəmizin milli maraqlarına xidmət edən bir media nümayəndəsi olaraq – Sizdən bu məsələdə mənə dəstək olmağınızı xahiş edirəm.
Əmək fəaliyyətinə “Kommunizm yolu” qəzetində korrektor, ədəbi işçi, müxbir və şöbə müdiri kimi başlayan Rafil Hüseynovun bu gün bir jurnalistə qarşı göstərdiyi münasibət Həsən bəy Zərdabinin qələminə sayğısızlıq və peşəkar etika prinsiplərinə ziddir. Köhnə mətbuat işçisi kimi o, vətəndaş şikayətini qəbul etmir, əksinə bu çağırışlara zidd olaraq, vətəndaş şikayətlərini və qanun pozuntularını ört-basdır etməyə çalışır və bunu qərəzli şəkildə məhkəməyə qədər aparır.
Hörmətli Mehriban xanım, Sizin ölkəmizdə humanist dəyərlərin və qadın haqlarının qorunmasında göstərdiyiniz misilsiz xidmətlər, humanitar sahədəki fəaliyyətiniz, şəfqət və mərhəmət nümunəsi olmağınız Azərbaycan qadınlarının inam və ümid yerinə çevrilmişdir.Siz hər zaman Azərbaycan qadınını müdafiə etmiş, onların cəmiyyətdə daha fəal və dəyərli mövqe tutmasına dəstək vermisiniz. Mən də bir ana, bir mətbuat işçisi kimi çarəsiz qalıb Sizin ədalətinizə və insani münasibətinizə güvənərək kömək istəyirəm.
Azərbaycan mətbuatının 150 illiyi ərəfəsində, bir vətəndaş, keçmiş əsgər anası kimi bu müraciətimə diqqətlə yanaşmağınızı və mənə yardımçı olmağınızı rica edirəm.
Sizə möhkəm can sağlığı, uzun ömür və çətin, lakin şərəfli fəaliyyətinizdə uğurlar arzulayıram!
Hörmətlə,
Abışova Pərvin Şakir qızı
Aztimes.az saytının təsisçisi və baş redaktoru”
