ABŞ Pentaqonun hərbi planlarını həyata keçirmək üçün ehtiyac duyduğu Patriot kompleksləri üçün raketlərin cəmi 25%-nə malikdir. Ehtiyatların bir hissəsi Yaxın Şərqdə xərclənib.
Herbiand.az bildirir ki, bu barədə “The Guardian” mənbələrə istinadən məlumat yayıb.
Mənbələr jurnalistlərə bildiriblər ki, məhz Patriot raketlərinin çatışmazlığı ABŞ-ın Ukraynaya hərbi yardımının dayandırılmasına səbəb ola bilərdi. Onların fikrincə, hazırda Vaşinqtonda əməliyyat planlarını həyata keçirmək üçün tələb olunan minimumdan daha az sursat var.
Nəşr vurğulayır ki, Pentaqonun sursat ehtiyatlarına nəzarət edən izləyicinin məlumatına görə, bir sıra kritik sursat ehtiyatları bir neçə ildir ki, minimum məqbul səviyyədən aşağıdır. Mənbələr jurnalistlərə bildiriblər ki, onların ehtiyatları ABŞ-ın keçmiş prezidenti Co Baydenin administrasiyası Ukraynaya hərbi yardım göndərməyə başlayandan sonra kəskin şəkildə azalmağa başlayıb.
Nəşrin mənbələri qeyd ediblər ki, ABŞ-ın hazırkı prezidenti Donald Trampın administrasiyası təxminən fevral ayında Patriot raketləri və digər hərbi sursat ehtiyatlarının səviyyəsini nəzərdən keçirməyə başlayıb. Vaşinqton Yaxın Şərqdə daha çox sistem yerləşdirmək qərarına gəldikdən sonra vəziyyət daha da pisləşib.
Bəxtiyar CƏFƏRLİ
