Azərbaycan Polisi sabitliyin qarantı, dövlətin dayağıdır » AzadMedia.az

Məşhur Məmmədov,
Millət vəkili

2 iyul Azərbaycanda Polis Günü kimi qeyd olunur. Bu tarix sıradan bir peşə bayramı deyil, dövlətçiliyin dayaqlarından biri olan daxili işlər orqanlarının fəaliyyətinə verilən yüksək qiymətin rəmzidir. Ölkənin təhlükəsizliyinin, ictimai asayişin, hüquq və qanunçuluğun təmin olunmasında Azərbaycan polisinin rolu misilsizdir. Bu gün eyni zamanda dövlətin hüquq-mühafizə orqanlarına, xüsusilə polis əməkdaşlarına göstərdiyi diqqət və qayğının nümayişidir.

Azərbaycan polisi öz tarixi ilə qürur duyur. Müstəqillik əldə olunduğu ilk illərdən bu günə qədər daxili işlər orqanları çətin və şərəfli bir yol keçib. Ölkədə sabitliyin bərqərar olması, cinayətkarlıqla mübarizə, vətəndaşların təhlükəsizliyinin təmin edilməsi sahəsində polis əməkdaşlarının əvəzsiz xidməti olub. Xüsusilə 1990-cı illərin əvvəllərində dövlətçiliyin təhdid altında olduğu dövrdə Azərbaycan polisi həm separatizmlə mübarizədə, həm də daxili sabitliyin bərpasında mühüm rol oynayıb.

Müstəqil Azərbaycan dövlətinin banisi və memarı Ulu Öndər Heydər Əliyevin 1998-ci ildə imzaladığı sərəncamla 2 iyulun Azərbaycan Polisi Günü kimi təsis olunması bu qurumun dövlət həyatındakı önəminə verilən yüksək dəyər idi. Ulu Öndər deyirdi: “Polis xalqın və dövlətin keşiyində duran qurumdur.”

Bu gün Prezident İlham Əliyevin rəhbərliyi ilə Azərbaycan polisi hərtərəfli islahatlar dövrünü yaşayır. Müasir texnoloji imkanlarla təchizat, hüquqi bazanın təkmilləşdirilməsi, şəxsi heyətin peşəkarlığının artırılması və sosial rifahın yaxşılaşdırılması istiqamətində atılan addımlar nəticəsində daxili işlər orqanları bu gün tamamilə yenilənmiş bir sistemə çevrilib. Dövlət başçısının dəfələrlə vurğuladığı kimi, Azərbaycan polisi müasir dövrün çağırışlarına cavab verən, xalqın xidmətində olan bir qurumdur.

Azərbaycan polisi yalnız daxili təhlükəsizliyi təmin edən qurum deyil, o, həm də vətənpərvərlik nümunəsidir. 44 günlük Vətən müharibəsində polis əməkdaşları və daxili qoşunlar silaha sarılaraq döyüş meydanında igidlik göstərdi. Dövlətə sədaqət, Vətənə sevgi və xalqa xidmət prinsipləri bu qəhrəmanlıqda öz təcəssümünü tapdı. Polis əməkdaşlarının bir çoxu bu döyüşlərdə şəhidlik zirvəsinə ucaldı, onlarla əməkdaş isə ali dövlət təltiflərinə layiq görüldü.

Digər tərəfdən, polis-vətəndaş münasibətləri də keyfiyyətcə yeni mərhələyə qədəm qoyub. Bugünkü polis vətəndaşa daha yaxın, daha çevik və daha şəffaf yanaşma sərgiləyir. “Xalq üçün polis, xalqla polis” prinsipinə əsaslanan fəaliyyət anlayışı hüquq-mühafizə orqanlarını sadəcə inzibati orqan yox, eyni zamanda sosial ədalətin, ictimai rifahın qoruyucusuna çevirib.

Azərbaycanın inkişafı, sabitliyi və təhlükəsizliyi üçün çalışan polis əməkdaşları öz peşəkarlığı, fədakarlığı və intizamı ilə dövlətə və xalqa sədaqətin nümunəsidir. Onların fəaliyyəti sayəsində bu gün ölkəmizdə sabitlik hökm sürür, əhalinin təhlükəsizliyi təmin olunur, cəmiyyət cinayətkarlardan qorunur.

Bu gün biz xalqın və dövlətin keşiyində dayanan, gecə-gündüz demədən çalışan, çətin və məsuliyyətli vəzifəsinin öhdəsindən peşəkarcasına gələn polis əməkdaşlarına dərin təşəkkürümüzü bildiririk.

Polis Günü münasibətilə bütün hüquq-mühafizə orqanlarında çalışan əməkdaşları və veteranları təbrik edir, onlara möhkəm cansağlığı, çətin və şərəfli xidmətlərində uğurlar arzulayıram.