QƏZZAYA HÜCUMLAR İNTENSİVLƏŞİR » AzadMedia.az

İsrail qüvvələri Qəzza zolağında həyata keçirdikləri hücumlar nəticəsində azı 102 fələstinlini qətlə yetirib. Birləşmiş Ştatlar prezidenti Donald Tramp isə İsrailin Qəzzaya qarşı müharibəsini dayandırmaq məsələsində İsrailin baş naziri Benyamin Netanyahuya qarşı “çox sərt” olacağını iddia edib.

Bu arada, İsrailin hücumları nəticəsində Qəzzanın şimal və cənub bölgələrində bir neçə yaşayış məhəlləsini tamamilə dağıdıb. Bunun fonunda, bölgədə yeni quru əməliyyatın başlanacağı ilə bağlı narahatlıqlar artıb.

Hücumlar İsrailin baş naziri Benyamin Netanyahunun gələn həftə Vaşinqton şəhərinə planlaşdırılan səfəri ərəfəsində baş verib. ABŞ prezidenti Donald Tramp bildirib ki, Netanyahu Qəzzadakı müharibəyə son qoymaq istəyir, baxmayaraq ki, İsrail qüvvələri bölgədəki hücumlarını daha da gücləndirir.

Tibbi mənbələrin məlumatına görə, öldürülən fələstinlilər arasında 16 nəfər aclıqdan əziyyət çəkən və yardım axtaran şəxslər olub. Onlar ABŞ və İsrailin dəstəklədiyi, mübahisəli Qəzza Humanitar Fondu (QHF) tərəfindən idarə olunan yardım paylama məntəqələrində İsrail əsgərlərinin kütləyə atəş açması nəticəsində həlak olublar.

Bu şəxslər QHF-nin may ayının sonlarında İsrailin ağır blokadası fonunda Qəzzaya məhdud humanitar yardım çatdırılmasına nəzarəti ələ aldığından bəri hər gün bu məntəqələrdə baş verən hücumlar zamanı öldürülən təqribən 600 fələstinli arasında sonunculardır.

170-dən çox böyük beynəlxalq xeyriyyə təşkilatı və qeyri-hökumət qurumu QHF-nin dərhal fəaliyyətini dayandırması üçün çağırış edib. Hüquq müdafiəçilərinin fikrincə, bu qurum beynəlxalq prinsipləri pozaraq fəaliyyət göstərir.

“Qəzzadakı fələstinlilər ya aclıqdan ölmək, ya da ailələrini doyurmaq ümidi ilə qida əldə etməyə çalışarkən güllələnmək kimi qeyri-mümkün bir seçimlə üz-üzədirlər,” – deyə birgə bəyanatda vurğulanıb.

Bəyanatda o da qeyd olunub ki, QHF “Qəzza xalqına aclıq və güllə yağışından başqa bir şey gətirmir.