"Səssiz gələn təhlükədən özünüzü qoruyun və mütəmadi olaraq tibbi müayinələrdən keçin - sağlamlığın dəyəri ölçülməzdir..."
Xərçəng çox vaxt səssiz və gizli şəkildə inkişaf edir. Bəzi hallarda əlamətlər xəstəliyin son mərhələsinə qədər özünü göstərmir. Məhz buna görə də bədəndəki hər bir dəyişiklik diqqətlə izlənilməli və vaxtında tibbi yardım alınmalıdır.
Moderator.az xəbər verir ki, bu barədə "American Cancer Society" nəşri yazıb.
Amerika Xərçəng Cəmiyyətinin tövsiyə etdiyi bu əlamətlər bəzən xərçənglə əlaqəli olmaya bilər, amma yenə də onları nəzərə almamaq böyük səhv ola bilər.
Dəridəki dəyişikliklər
Yeni yaranan ləkələr, kənarları qeyri-müəyyən olan, rəngi və forması dəyişən xallar - dəri xərçəngi, xüsusilə də melanomanın əlaməti ola bilər. Dərhal dermatoloqa müraciət etmək məsləhətdir.
Uzanmış öskürək
3 həftədən çox davam edən, xüsusilə qanlı bəlğəmlə müşayiət olunan öskürək ağciyər xərçənginin ilkin göstəricisi ola bilər. Belə hallarda bronxoloji müayinə vacibdir.
Döşdə qeyri-adi dəyişikliklər
Qadınlarda döşdə bərkimə, ağrı, dərinin çəkilməsi və ya gilədən ifrazat süd vəzi xərçəngi riskini artırır. Mammoqrafiya və ya USM mütləqdir.
Qarında daimi şişkinlik
Xüsusilə qadınlarda yumurtalıq xərçəngi bu simptomla gizli şəkildə özünü göstərə bilər. Əgər bu hal mütəmadi baş verirsə, ginekoloqa getmək gecikdirilməməlidir.
Sidik ifrazında çətinlik (kişilərdə)
Sidik axınının zəifləməsi, natamam boşalma hissi və tez-tez sidiyə çıxma prostat vəzi problemlərini, hətta prostat xərçəngini göstərə bilər.
Limfa düyünlərinin böyüməsi
Əgər boyun, qoltuqaltı və ya qasıq nahiyəsindəki limfa düyünləri sərt, ağrısız və uzunmüddətli qalırsa, bu, limfoma və ya leykozun əlaməti ola bilər.
Sidikdə və ya nəcisdə qan
Hətta babasil olsa belə, qanaxma mütləq yoxlanılmalıdır. Çünki bağırsaq, sidik kisəsi və böyrək xərçəngi bu cür başlayır.
Xayalarda sərtləşmə və dəyişikliklər
Xayaların ölçüsündə, formasında və sıxlığında fərqlər varsa, bu xaya xərçənginin xəbərçisi ola bilər. USM vacibdir.
Udqunma çətinliyi
Yemək udmaqda getdikcə artan çətinliklər qida borusu və ya qırtlaq xərçəngini göstərir.
Qeyri-adi qanaxmalar (qadınlarda)
Menstruasiyadan kənar qanaxmalar və ya menopauzadan sonra baş verən hallar uşaqlıq, uşaqlıq boynu və ya yumurtalıq xərçəngi ilə bağlı ola bilər.
Ağız boşluğunda sağalmayan yaralar
Ağızda ağ və ya qırmızı ləkələr, xüsusən də siqaret çəkən şəxslərdə yaranan ağrılı yaralar ağız boşluğu xərçənginin əlamətidir.
Birdən-birə arıqlama
Əgər izaholunmaz şəkildə 5 kiloqram və ya daha çox çəki itkisi varsa, bu, mədəaltı vəzi, mədə, ağciyər və ya digər orqan xərçəngi ilə bağlı ola bilər.
Səbəbsiz qızdırma
Uzunmüddətli və səbəbsiz olaraq Selsi üzrə 37-38 dərəcə ətrafında dəyişən temperatur qan və limfa sistemindəki onkoloji problemlərə işarə edə bilər.
Mədə yanması və həzm pozğunluğu
Daimi mədə narahatlığı, yanma hissi və həzm çətinlikləri qida borusu, mədə və ya bağırsaq xərçənginin müjdəçisi ola bilər.
Xroniki yorğunluq
İstirahətdən sonra belə keçməyən zəiflik və yorğunluq qan xərçəngi və ya digər xərçəng növlərinin gizli əlamətlərindəndir.
Əgər bu əlamətlərdən bir və ya bir neçəsi sizdə müşahidə olunursa, gecikmədən həkimə müraciət edin. Xərçəng nə qədər tez aşkar olunarsa, müalicə şansı bir o qədər yüksək olur. Özünüzü qoruyun və mütəmadi olaraq tibbi müayinələrdən keçin - sağlamlığın dəyəri ölçülməzdir.
