BAKI, TurkicWorld
Özbəkistan və Monqolustan strateji tərəfdaşlığa dair sənəd imzalayıb.
TurkicWorld xəbər verir ki, Özbəkistan və Monqolustan prezidentləri iki ölkə arasında hərtərəfli strateji tərəfdaşlıq əlaqələrinin inkişafına dair birgə bəyannamə imzalayıblar.
Özbəkistan Prezidenti Şavkat Mirziyoyevin Monqolustana rəsmi səfəri çərçivəsində Prezident Xurelsux Uxnaa ilə keçirilən görüşdə qarşılıqlı ticarət həcminin artırılması və investisiya mühitinin yaxşılaşdırılması istiqamətində addımlar müzakirə olunub.
Görüş zamanı liderlər əməkdaşlığın kənd təsərrüfatı, sənaye, səhiyyə, təhsil, mədəniyyət, idman və ətraf mühit sahələrini əhatə edən yeni sazişlərin imzalandığını açıqlayıblar. Razılaşmaların vaxtında həyata keçirilməsi üçün xüsusi yol xəritəsi hazırlanacağı bildirilib.
Qeyd edək ki, bu səfər Özbəkistan-Monqolustan münasibətlərində yeni mərhələnin əsasını qoyur və iki ölkə arasında çoxşaxəli əlaqələrin dərinləşməsinə xidmət edəcək.
