“İran uranın dinc məqsədlərlə zənginləşdirilməsindən vaz keçmək niyyətində deyil. Tehran Nüvə Silahlarının Yayılmaması Müqaviləsi üzrə öhdəliklərini yerinə yetirməkdə davam edir və digər dövlətlərin bu məsələdə İranı məhdudlaşdırmaq hüququ yoxdur”.
Modern.az xəbər verir ki, bunu İranın xarici işlər nazirinin müavini Məcid Taxt-Rəvançi Almaniyanın ARD telekanalına deyib.
O, həmçinin qeyd edib ki, iyunun 21-dən 22-nə keçən gecə ABŞ Hərbi Hava Qüvvələrinin endirdiyi zərbələrdən sonra İranın nüvə proqramının vəziyyəti ilə bağlı açıqlama vermək niyyətində deyil.
Eyni zamanda, nazir müavini vurğulayıb ki, partlayışın özü “açıq-aşkar təcavüz aktını” təmsil edir.
Taxt-Rəvançi qeyd edib ki, İran bu vəziyyətdə “təcavüz qurbanı”dır və BMT Nizamnaməsinin 51-ci maddəsinə uyğun olaraq cavab vermək hüququna malikdir. Eyni zamanda diplomat İranın Yaxın Şərqdəki Amerika bazalarına zərbə endirməsi ehtimalını şərh etməyib.
Xarici işlər nazirinin müavini İsrailin İrana qarşı əməliyyatını dəstəkləyən Almaniya kansleri Fridrix Mertsi tənqid edib və yəhudi dövlətinin öz hərəkətləri ilə bütün Qərb ölkələri üçün “çirkli iş” gördüyünü bəyan edib.
Taxt-Rəvançi Berlini “təcavüzkarın deyil, qurbanın tərəfini” tutmağa çağırıb.
