Çin mühəndisləri "Starlink" sistemini kölgədə qoyacaq, daha yüksək ötürmə qabiliyyətinə malik peyk rabitə texnologiyası hazırladıqlarını bildiriblər...
Poliqon xəbər verir ki, bu barədə məlumat South China Morning Post qəzetində dərc olunub.
Hazırda fəaliyyət göstərən peyk rabitə sistemləri, o cümlədən "Starlink" saniyədə cəmi bir neçə meqabit sürətlə məlumat ötürə bilir. Lakin çinli alimlərin sözlərinə görə, onlar bu göstəricini xeyli üstələyiblər. Onlar cəmi 2 vatt gücündə zəif lazerdən istifadə edərək, Yerdən 36 min kilometr hündürlükdə yerləşən peykdən saniyədə 1 qiqabit sürətlə siqnal ötürə biliblər. Bu göstərici "Starlink" sistemindən beş dəfə yüksəkdir.
Optik kanal vasitəsilə siqnal ötürülməsi zamanı əsas problem lazer şüasının atmosferdə səpələnməsi və zəifləməsidir. Bu isə belə ötürmə üsulunu qeyri-effektiv edir. Əvvəlki cəhdlər – işığın təhrifini düzəltmək üçün adaptiv optikadan və ya səpələnmiş siqnalları qəbul edə bilən xüsusi qəbuledicilərdən istifadə – yetərincə uğurlu olmamışdı.
Bu dəfə isə Çin tədqiqatçıları hər iki yanaşmanı birləşdirərək uğur əldə ediblər. Onlar 1,8 metrlik teleskop vasitəsilə lazer şüasını peykdən elə istiqamətləndiriblər ki, atmosferdən keçərkən siqnal keyfiyyətini itirməyib. Sistem yüzlərlə mikro güzgüdən ibarət olub: onlar şüanı “hamarlayır”, xüsusi çiplər isə müxtəlif kanallardan ən güclü siqnalları seçib birləşdirirdi.
Nəticədə məlumat ötürülməsi zamanı uğur ehtimalı 72 faizdən 91 faizə yüksəlib. Bu isə kosmosdan lazer əlaqəsi sahəsində əhəmiyyətli bir irəliləyiş hesab olunur. Görünür, Çin bu texnologiya üzrə liderliyə doğru irəliləyir.
"South China Morning Post"un yazdığına görə, hələ 2020-ci ildə "Shijian-20" peyki saniyədə 10 qiqabit sürətlə məlumat ötürməsi üzrə rekord qırmışdı. Onun lazerinin dəqiq gücü sirr saxlanılsa da, ABŞ bu texnologiyaya o qədər maraq göstərmişdi ki, müşahidə məqsədilə bölgəyə kəşfiyyat peyki göndərmişdi. Lakin Çin peyki orbitini dəyişərək "gözlərdən itmişdi".
Poliqon.info
