İranda artan daxili siyasi qeyri-sabitlik və rejimin gələcəyi ilə bağlı yüksələn qeyri-müəyyənlik qlobal enerji bazarlarında narahatlıqlara səbəb olur. Mütəxəssislər xəbərdarlıq edir ki, rejim ciddi böhranla üzləşərsə, Hörmüz boğazı və Körfəzdəki enerji infrastrukturu birbaşa hədəfə alına bilər.
“JPMorgan” xəbərdarlıq edib ki, İranda mümkün rejim dəyişikliyi neft bazarında ciddi qiymət artımlarına səbəb ola bilər.
İsrail və İran arasında on gündür davam edən gərginlik Tehran administrasiyasını daha da gərginləşdirib və neft tədarükündə mümkün fasilələr ehtimalını artırıb. Hazırda qlobal neft axınında ciddi bir pozulma olmasa da, münaqişənin kəskinləşəcəyi təqdirdə bu vəziyyətin sürətlə dəyişə biləcəyi bildirilir.
“JPMorgan” tərəfindən dərc edilən məlumatlara görə, 1979-cu ildən bəri əsas neft hasil edən ölkələrdə səkkiz rejim dəyişikliyi neft qiymətlərinin orta hesabla 76 faiz artmasına səbəb olub. Bank İranda mümkün siyasi transformasiyanın Liviya nümunəsindən daha dərin və daha geniş nəticələrə səbəb ola biləcəyini proqnozlaşdırır.
