Beynəlxalq Atom Enerjisi Agentliyinin (MAQATE) etibarlı yoxlama sistemi İranda nüvə silahlarının hazırlanmayacağına zəmanət verə bilər.
Bu fikri Agentliyin Baş direktoru Rafael Qrossi İranın tələbi ilə çağırılmış və Tehranla Təl-Əviv arasında gərginliyin müzakirə olunduğu BMT Təhlükəsizlik Şurasının fövqəladə iclasında səsləndirib.
"İcazə verin, beynəlxalq ictimaiyyəti bu çox ağır zamanda MAQATE-nin davamlı dəstəyinə zəmanət verməklə yekun edim. Əgər lazımi siyasi iradə varsa, razılaşmanın elementləri müzakirə olunubsa, diplomatik həll yolu əlçatandır, MAQATE yoxlama sistemimiz vasitəsilə İranda nüvə silahının hazırlanmayacağına zəmanət verə bilər", - o vurğulayıb.
Qrossinin fikrincə, "bu fürsəti əldən vermək olmaz. Alternativ uzun sürən münaqişə və Yaxın Şərqdən gələn nüvə silahının yayılması təhlükəsi olardı ki, bu da NPT-ni və bütövlükdə nüvə silahının yayılmaması rejimini təsirli şəkildə məhv edər".
