Sumqayıt şəhərində şəhidlərin xatirəsinin əbədiləşdirilməsi istiqamətində daha bir önəmli layihə həyata keçirilir. Şəhər İcra Hakimiyyətinin başçısının tapşırıq və tövsiyələri əsasında Sumqayıt Bələdiyyəsi tərəfindən Yaşma yaşayış massivində yerləşən, Vətən Müharibəsi şəhidi Cavid Mirzəyevin adını daşıyan küçəyə asfalt örtüyü çəkilir.
Hazırda ərazidə intensiv iş gedir. Texnikalar və işçi qüvvəsi küçənin tam bərpası üzərində çalışır. Küçənin uzunluğu 500 metr, eni isə 4 metr təşkil edir. Bu layihə çərçivəsində ümumilikdə 2 min kvadratmetr asfalt örtüyünün döşənməsi nəzərdə tutulub. Asfalt materialı artıq əraziyə gətirilib və döşənmə işlərinə başlanılıb.
Yerli sakinlərin sözlərinə görə, bu yol uzun illərdir ciddi problemlərə səbəb olurdu. Yağışlı havalarda palçıq, quru havalarda isə toz-torpaq insanlara narahatlıq verirdi. İndi isə yolun asfaltlanması həm gündəlik rahatlığı təmin edəcək, həm də şəhid Cavid Mirzəyevin adına layiq bir mühitin formalaşmasına şərait yaradacaq.
Şəhidin atası görülən işlərdən məmnunluğunu bildirərək dövlətin və bələdiyyənin bu təşəbbüsünü yüksək qiymətləndirib. O qeyd edib ki, oğlunun adını daşıyan küçənin abadlaşdırılması onların ailəsi üçün böyük bir mənəvi təsəlli və qürur mənbəyidir.
Sumqayıt Bələdiyyəsinin nümayəndələri isə bildiriblər ki, bu cür layihələr təkcə infrastrukturun yaxşılaşdırılmasına deyil, eyni zamanda şəhidlərin əziz xatirəsinin yaşadılmasına xidmət edir. Onların sözlərinə görə, şəhər üzrə digər küçə və yaşayış massivlərində də oxşar abadlıq işləri mərhələli şəkildə həyata keçiriləcək.
Bu təşəbbüs, şəhid ailələrinə göstərilən qayğının dövlət siyasətində xüsusi yer tutduğunu və Azərbaycan uğrunda canından keçən qəhrəmanların xatirəsinin daim uca tutulduğunu bir daha sübut edir.
Şəhid Cavid Mirzəyevin adını daşıyan küçəyə çəkilən asfalt örtüyü həm şəhidə ehtiramın, həm də ictimai rifah naminə atılan əhəmiyyətli addımın bariz nümunəsidir.
