Böyük Britaniyanın müdafiə naziri Con Hili Yaxın Şərqə əlavə Kral Hərbi Hava Qüvvələri (RAF) təyyarələrinin yerləşdirildiyini açıqlayıb. O, bu addımın İrandan gələ biləcək istənilən təhdidə qarşı daha yaxşı müdafiə məqsədi daşıdığını bildirib.
Britaniya mediasının məlumatına görə, nazir Hili Kral Birləşmiş Xidmətlər İnstitutunda (RUSI) keçirilən konfransda gündəmə dair açıqlamalar verib.
Hili bildirib ki, Britaniya qırıcıları artıq Yaxın Şərqə çatmağa başlayıb və qarşıdakı günlərdə bölgəyə daha çox təyyarə göndəriləcək.
Nazir qeyd edib ki, bu təyyarələr personalı qorumaq, tərəfdaşlara etimad vermək və yaranmış gərginliyi azaltmaq ehtiyacını gücləndirmək üçün operativ cavab tədbiri kimi göndərilib.
Təyyarələrin İsrailin müdafiəsində istifadə olunub-olunmayacağı ilə bağlı suala dəqiq cavab verməkdən yayınan Hili, həmçinin gələcəkdə ABŞ-ın İrana qarşı ehtimal edilən hava hücumlarında bu təyyarələrin iştirak edib-etməyəcəyi ilə bağlı suala da cavab verməyib.
Hili əlavə edib ki, təyyarələr Böyük Britaniyanın Cənubi Kipr Rum İdarəsindəki və Omandakı hərbi mövcudluğunu İrandan gələ biləcək istənilən təhdiddən daha yaxşı qorumaq üçün yerləşdirilib.
Tərəfləri təmkinli olmağa çağıran Hili diplomatik həll yolunun davamlı sülhə çatmağın yeganə yolu olduğunu vurğulayıb.
Böyük Britaniyanın baş naziri Keir Starmer də Yaxın Şərqdə baş verə biləcək vəziyyətlərə dəstək məqsədilə bölgəyə RAF təyyarələrinin göndərilməsi qərarını açıqlamışdı.
Baş nazirliyin 10 nömrəli ofisindən verilən açıqlamada isə bildirilirdi ki, hazırda bölgədə olan RAF qırıcılarına və yanacaq doldurma təyyarələrinə əlavə olaraq yeni təyyarələr göndəriləcək.
