Rusiya Dövlət Kitabxanasının Şərq Ədəbiyyatı Mərkəzində Azərbaycanın Rusiyadakı səfirliyinin dəstəyi ilə “Dünya xalqlarının nağıllarında uşaq hüquqları” kitabının təqdimat mərasimi keçirilib.
APA-nın Moskva müxbiri xəbər verir ki, kitab Azərbaycan Respublikası Hökumətinin dəstəyi ilə həyata keçirilən Rusiya Pediatrlar İttifaqı və Azərbaycan Pediatrlar Assosiasiyasının birgə layihəsidir.
Təqdimat mərasimində Rusiyanın tanınmış elm və tibb xadimləri, Azərbaycan və Rusiya KİV-lərinin, eləcə də Moskvanın azərbaycanlı icmasının nümayəndələri, Moskva ali məktəblərinin azərbaycanlı əsilli müəllim və tələbələri iştirak ediblər.
Rusiya Dövlət Kitabxanasının Şərq Ədəbiyyatı Mərkəzinin rəhbəri Marina Melanina qonaqları salamlayaraq, Şərq Ədəbiyyatı Mərkəzinin Azərbaycanla çoxillik dostluq və yaradıcılıq əlaqələrinin olduğunu, mərkəzdə əvvəllər də Azərbaycan kitablarının təqdimatlarının və müxtəlif sərgilərin keçirildiyini qeyd edib.
Azərbaycanın Rusiyadakı səfiri Rəhman Mustafayev çıxışında bu layihənin mühüm təhsil və maarifləndirici əhəmiyyətinə, layihə çərçivəsində cəmiyyətin uşaq hüquqları ilə bağlı əlçatan və rahat formada məlumatlandırılmasına diqqət çəkib.
Kitabın həmmüəlliflərindən biri, Avropa Pediatriya Assosiasiyasının prezidenti, Rusiya Pediatrlar İttifaqının İcraiyyə Komitəsinin sədri, Rusiya Federasiyasının əməkdar elm xadimi, Rusiya Elmlər Akademiyasının akademiki Leyla Namazova-Baranova “Dünya xalqlarının nağıllarında uşaq hüquqları” kitabının Azərbaycan və Rusiya pediatrlarının birgə işinin nəticəsi olduğunu söyləyib.
O, kitabın təqdimatının təşkilində göstərdiyi dəstəyə görə Azərbaycan səfirliyinə minnətdarlığını bildirib.
Leyla Namazova-Baranova nəşrin məzmunundan danışaraq vurğulayıb ki, “BMT-nin Uşaq Hüquqları Konvensiyasından” (1990-cı il) çıxarışlar sənədin hər bir maddəsini təsvir edən şəkillərlə xüsusi seçilmiş nağıllarla dəstəklənir. Bildirib ki, bu kitabın mütaliəsi uşaqlara və onların valideynlərinə uşaq hüquqları haqqında daha çox məlumat əldə etmək, dil bacarıqlarını inkişaf etdirmək və dost xalqın mədəniyyətini dərindən öyrənmək imkanı verəcək.
Tədbir Moskva Dövlət Beynəlxalq Əlaqələr Universitetinin (MQİMO) Yaxın və Orta Şərq ölkələrinin dilləri kafedrasının professoru, Azərbaycan Yazıçılar İttifaqının Moskva bölməsinin sədri Abuzər Bağırovun, K. Kərimov adına məktəbin direktorunun müşaviri Ramidə Qasımova və rusiyalı rejissor, prodüser və ssenarist Yelena Tverdoxlebib çıxışları ilə davam edib. Onlar kitabla bağlı təəssüratlarını bölüşüblər və əlavə ediblər ki, kitabın xüsusi üstünlüyü həm də ikidilli, yəni eyni zamanda rus və Azərbaycan dillərində yazılmasıdır.
