Müəllif: Tamara Mustafayeva, Banco.az
Çin Xalq Bankının (PBOC) qubernatoru Pan Qonqşeng yaxın illərdə dolların hökmranlığının azalacağını və daha rəqabətli məzənnə sisteminin yaranacağını proqnozlaşdırıb.
Banco.azxəbər verir ki, Pan çərşənbə günü Şanxayda keçirilən illik Lujiazui Forumunda çıxışı zamanı bildirib ki, “Gələcəkdə qlobal pul sistemi bir neçə suveren valyutanın paralel şəkildə mövcud olduğu, rəqabət apardığı və bir-birini tənzimləyib tarazlaşdırdığı bir istiqamətə doğru inkişaf edə bilər.”
Pan əlavə edib ki, dünyada tək bir valyutaya həddindən artıq asılılığın necə azaldılacağı ilə bağlı geniş müzakirələr aparılır və son illərdə yuanın qlobal statusunun yüksəldiyini vurğulayıb.
Donald Trampın ikinci prezidentlik dövründə həyata keçirdiyi siyasətlər ABŞ valyutasına olan etibarı sarsıdıb. İnvestorlar son vaxtlar dollar aktivlərini azaltmağa başlayıblar. Avropa Mərkəzi Bankının (ECB) rəhbəri Kristin Laqard da bu yaxınlarda mümkün bir “qlobal avro anı”ndan danışıb. Çin isə yuanı ABŞ dollarına rəqib kimi mövqeləndirir.
Bu, Prezident Şi Cinpinin, xüsusilə Trampın ikinci dövründə ABŞ ilə gərginliyin artması fonunda, qlobal ticarətdə artan rol oynaya biləcək qədər sabit valyutaya sahib maliyyə gücünə çevrilmək istiqamətindəki səylərinin davamıdır. US Bancorp-un bir nümayəndəsinin sözlərinə görə, bu ilki gömrük rüsumları ilə bağlı risklər bu səyləri daha da gücləndirib və bəzi amerikalı ixracatçılar dolların dəyişkənliyindən qorunmaq üçün yuan da daxil olmaqla alternativ valyutalarla ödəniş tələb etməyə başlayıblar.
Bizi sosial şəbəkələrdən izləyin!!
